Popular Bible Verses from Matiu 24

Share

Fiki rẹ imwemwu buebu re cha rhe akpọ na, ẹguọnọ rẹ ihwo buebu ki che djiro. Ẹkẹvuọvo ihwo ri se chirako te oba, kẹ eye re cha rhọ.

Ka cha ta ota rẹ iyẹnrẹ esiri na wan akpọ na ejobi, rere ọ vwọ dia iseri kẹ ẹgborho na ejobi; tavwe rẹ oba na ki rhi te.

We che nyo umri rẹ ofovwi kugbe edo rẹ ofovwi. We jẹn udu bru ovwa-an, kidie enana ejobi cha wan vrẹn; ẹkẹvuọvo je oba na ji te-e.

Kidie ẹgborho cha vwọ so ẹgborho, uvie cha vwọ so uvie, owẹvwe che fi, otọ che kpogho vwẹ asan buebu. Ẹkẹvuọvo enana ejobi ke cha dia ẹtuọhọ rẹ oja.

Odjuvwu vẹ akpọ cha wan, ẹkẹvuọvo ota mẹ se she fia-a.

Kidie ihwo buebu cha rhe vwẹ odẹ mẹ nẹ, Mẹvwẹ hẹ Kristi na; o mi rhi sun ihwo buebu ghwru.

Ka cha vwẹ okpetu so ovwan ke hwe ovwan; ivun rẹ ovwan ko che miovwo ẹgborho ejobi fiki rẹ odẹ mẹ. Ihwo buebu ki che she, ohwohwo ko che mu ohwohwo; ivun che di mu ihwo miovwẹ. Emraro rẹ efian buebu cha rhe, ayen mi rhi sun ihwo buebu ghwru.

Jesu da kpahe ọ da ta kẹ ayen nẹ, Wa jomaotọ rere ohwo vwo jẹ ovwan esuo ghwro.

Fiki rẹ eriyin na we muegbe: kidie ọke wo roro phihọ-ọ, ọye Ọmọ rẹ ohwo cha vwọ rhe.

Gba rhẹrẹ; kidie wọ cha riẹn ẹdẹ rẹ Ọrovwohwo cha vwọ rhe-e.

Ẹkẹvuọvo ọke na eyẹ ẹdẹ na ohwo ọvuọvo sa riẹ-ẹn, emakashe rẹ obo odjuvwu sa riẹ-ẹn, ekpuyovwi rẹ Ọmọ rẹ ohwo je sa riẹn dede-e, jokpa rẹ Ọsẹ na ọvo.

Kidie Kristi rẹ efian cha rhe, kugbe emraro rẹ efian, ayen cha vwẹ eka buebu phia, kugbe emu rẹ igbunu buebu; rere ayen vwọ phiẹn ihwo buebu ghwru; udu rẹ ayen da gba ihwo ra sanọ reyọ dede na, a jẹ phiẹn ayen.

Kirobo rọ epha vwẹ ọke ri Noa, eriyin ẹcha rẹ Ọmọ rẹ ohwo je cha dia. Obo rọ epha tavwe rẹ oghwe na ki rhi ku eriyin ọ je dia; ayen rọ ria ayen rọ da, ayen rọvwọ eya ayen ji vwo bregọ, rhiri rhi te ọke ri Noa rhe vwọ ro okọ na. Ayen gbe riẹn ọke rẹ oghwe na rhi vwo ku-u, ayen de divwi ghwu vwẹ evun rẹ oghwe na; eriyin ẹcha rẹ Ọmọ rẹ ohwo na cha dia.