Popular Bible Verses from Exodus 20

Share

“Ayengan Akngey arrekantherrenh, itnan INGKARTarl. Atharl arrenhantherrenh Egypt-they atnwenhey-alpek, Egypt-arenyel-rnemarl arrenhantherrenh warrk ilkwa anthenh-kety, arrantherr tyayl-areny-apeny warrkirrenh. Ayengan Akngey arrekantherrenh anem. Arrantherr altyerr-arrpantey ingwer-rnem apentey-angenh anetyek. Atyengant arrantherr inkwerelhetyek.

Akngey-arrpantey ingwer-rnemel mpwarem apwert-penh arwerl-penh. Rernem altyerr-arrpantey mpwarem irrwerl-areny-apeny apek ahern-areny-apeny apek kwaty-areny-apeny apek. Rernem ikwer-rnem kwenerr-ayntetyek inkwerelhemel. Alakenh-anyem rernem apmwel-ayeth mpwarem atyengety. Alakenh-anyem arrantherr mpwarey-angenh! Akngey-arrpantey arrantherr mpwarey-angenh, kwenerrey-angenh ikwer-rnem. Menty ayntetyek! Ayengan Akngey arrekantherrenh anem, itnan INGKARTarl. Atha arrenhantherr antwerrkeman, atyenh-rnem. Arrantherr atyeng arlkarerrenty, altyerr-arrpantey apenterl-anenty, alakenh-they ayeng arrekantherr ahelerrem. Arrantherr apek alakenh atyengety intwemelerrenty, atha aler arrekantherrenh atwem alhewer, arrengey-rnem-then, artartey-rnem-then atwemarl, ingkern-penh-rnem ingkerrenh atwem alhewer.

Arrantherr akngeyek-then ameyek-then awelhetyek, rernem arrenhantherrenh ilenty. Antwerr alhey-angenh. Arrantherr ikwer-rnem awelhemel iylpareth anetyek, inkwerelhemel. Arrantherr ikwer-rnem awelhenty, arrantherr arleng-alenty anem apmer ikwer-itwek, atharl arrekantherr anthem.

Arrantherr arlta ltyerrey-angker atyenh iterl-ayntetyek. Arlta Saturday anyent impen ikwerel, arrantherr atyengant iterretyek wenh, atyeng iylpelirrey-angenh.

Itnan atyenh impen. Arrantherr itna atyenh INGKART arwa iley-angenh, arrantherr arraty-angkwarrant itna atyenh iletyek. Arrantherr itna atyenh apmwangkwarr itnewenty, atha arrenhantherr atwem.

Arlta 6-ek-atwetyant arrantherr alhewer warrkirr-ayntetyek. Arlta 7-el impen ltyerrey-angkerarl, arlta atyenharl. Ayengan Akngey arrekantherrenh, itnan INGKARTarl. Arlta ikwerel warrkirrey-angenh anetyek. Angka nhenh ingkerrenhekarl, aler-rnem arrekantherrenhek-then, warrkenh-rnemek-then, pwelek-rnem arrekantherrenhek-then, alethang-rnemek-then rernemarl aneyel arrekantherr-itwek.

Arrantherr alharlkwerrey-angenh ingwer-rnemek anetyek. Arrantherr ingwer-kenh apmer-they apek, anewikw-they apek, pwelek-akerr-they, tangkey-akerr-they, warrkenh ikwerenh-they alharlkwerrey-angenh anetyek. Ampwal nhenh-rnem aynteng, ingwer-kenhan aynteyel. Angka rlterrk nhenh-rnem arrantherr aleth-antey apenterl-ayntetyek ipmey-angenh.”

Arrantherr court-itwek ingwerenty irrtywerremel iley-angenh, arrantherr ingwerenty angka arratyant iletyek.

Arrantherr anewikw ingwer-kenh ikngwey-angenh anetyek.

Arrantherr ingwer-rnem ipmek atwey-angenh anetyek.

Arrantherr ingwer-kenh ampwal ilek-ilek irrtyertel iney-angenh anetyek.