Popular Bible Verses from 1 PITA 2

Share

Vae i kamu, i God u mataikamu ba kwara tulu ne kwareki a bela katukwale luna. Tulu kwareki a tangaloi lingilingi nona Hugwe Lakua. I kamu a tangaloi kokona, a vanuamiu katukwale. I kamu a tangaloi noi God kareaki. Aia u mataikamu kwara tulu ne viti matangwasaraki na nona bolokiana karekarea. Mo kwarekamu tina dodoki vaki lolo leleha hinea u karea haburu.

I Kraes aia sibona u kwali na noda vaivai hati lo tarabehina vaki lo kaibetu kwara i kita tana mulemai hoki na tangaloi mate, a vaivai hati nehe sina lavikita tea, vae tana toka kwara tana huri na hala na bakotoana. I kamu tulu mo ahi huri na mataikana lo tarabehina. Tuai i kamu hoki na sivsivi hinea rau huri saloi na halaga, ramo sala, vae hikani tulu mulemai taliku vaki mai Kraes hinea aia hoki na Kaitagahuri na sivsivi, aia a tangaloiki bakotoki hinea u tagahuri na mamaurianamiu.

Tuai tulu he kwareki te tangaloi noi God vohoki, vae hikani tulu kwareki a bulana tangaloi. Tuai i God he hakavikamu tea, he hago te maikamu, vae hikani u hakavikamu, u hago maikamu.

A leo i God u ngwasara vohoki, vae tulu ne lengaia haburu hoki na natu karagwa u lengaia haburu kwara ne kanikani ti retahina. A leo hi ne vaikamu tulu ne huira, vunu i God ne vakahikikamu.

Rabelagu. Tulu hugu lo varamana hika hoki na vanamaiana vohoki, hoki na tangaloi hinea a tataga tikei. Hikani nu seseaka hurikamu kwara tulu ne hatu vai na kinau hinea a tarabehimiu rau lengaia. A doridori aira vano hi rau tuku magaraki na maurianamiu. Tulu bohibohi ne taritarisa lo nako na tangaloi hinea rahe kikilai i God tea, kwara vae diko rana vitikamu kwara i kamu a tangaloi hati tulu tuku galo lo tangwata, vae rana taga kikilaki na nomiu boloboloki karea. Vunu rana tabe hakeki na hina i God hurikamu lo nona Rani hinea vae ne vanamai luna.

I kamu hinea tulu vanamai vaki mana noda Hugwe, tulu hoki na beru hinea hokinia rau ahi kwara i God ne tabe na nona ingwa kokona kikamu. Tulu boloki lolona hokinia i kamu a nona tangaloi* lingilingi kokona, kwara tulu ne bete a hilehile lakwae. A hilehile hi, tulu bete na mamaurianamiu lakwai God. Aia u lagwa kwara ne lai tabetabeki na nomiu hilehile hi huri tulu bulu mai Jisas Kraes* kwara tulu ne vai.

Huri na kinau vano hi, tulu ne tau letiuki na doridorimiu savia hinea rau hati. Tulu hatu kurakura, tulu hatu kwaha ki ringomiu vohoki, a kinau ne hatu kadikadikamu, tulu hatu uveuve tangaloi.

Tulu vanamai vaki mana noda Hugwe*, aia hi hoki na beru hinea u ahi. A kaitabe na ingwa ramo bega kinia, rau domi kwara u hati, ranahe vai na kinau te kinia, vae i God u mataia ba huri aia u tagaia kwara u karea haburu kareaki.

I kamu tulu materi ba, vae a bohibohianamiu ne vosangi na kinau hi. Vae tulu hatu domi kwara huri tulu materi ba, vae tulu ne vai na hatiki, tulu ne tavunikinia. Hetea. Aia tulu ne bohibohi ne taritarisa huri i kamu a tangaloi boloki noi God, aia a nomiu Masi.

A domikiana noi God aia hikwe. U lengaikamu kwara lalahi na nomiu bolokiana karekarea tulu ne vai na tangaloi hinea rahe kikilai na kinau tea rana hugu butu, ranahe kwaha rerarera te taliku.