Popular Bible Verses from Mjir Rom 1

Share

Kamnyar I aɗi akwa ngga səliyir ngkər labar na msəra nə wa, kamnyar tsan dunar Hyel na akwa mbantə kəlara mdə na ku hamta jiri, ntangkəma aka mjir Yahudi, kambəla tsuwa mji na aɗi mjir Yahudi wa.

Kamnyar labar na msəra ni akwa ngkərɓəla laku tə Hyel namtə mji ka da ndzi kula biku akəmari atar hamta jiri, təng akwa baɗitari har kurari. Apatə kakaɗər Hyel pəla abbər, “Atar hamta jiri antə mji na ku ndzi ka jirkur akəma Hyel ata sə ndzi ka mpikə na jirari.”

Kamnyar təng tsu akwa sakatə Hyel namtə duniya antə tsa ncaɓəla halayeri arni natə mda amzhi wutari wa, apa kuthlikurərni na ba saka madi, ka laku tə tsa akwa. Kamnyar mda ata mzhi nggaɓəla ɗa atar suayeri tə tsa namta. Antə apani da aɗi ka sur vətə kəra wa.

Kamnyar wala tə da ku səndə Hyel, da aɗi na alari səli apatə kalkal ka mdə hamta aka Hyel wa, tsuwa da aɗi usar ni wa. Antə da baɗitə dzam gapangapani, tə kəra ɗa na kula nggaɓəla su ni ku ndzi kuthlu.

Da nggəlar hamta jiri aka jirkur ata kəra Hyel, ka hamta jiri aka thlandər. Antə da vəngkər səli ka hara mafakur aka su tə Hyel namta, ata vəya vəngkər səli aka Hyel ka kərari, natə kalkal ka mdə hu ni ba saka madi. Amin.

Kamnyar Hyel akwa vəi ndzəndziyirni na amtazi akwa ncantə ɗəffə bwarbwarkurərni ata kəra shanga mjir biku kəga mji na kəmanggar na akwa ntsari jirkur ka kəthlər kəmanggarkurər ɗa.

An su na hara tə Hyel zhar ɗa ka da hara shanga sur səli tə da akwa barari ni. Har mwankir ɗa zhar kəɓa ka sal akwa laku tə Hyel vəi, ka ləkwa bara nvwa ɗa. Wala mji shilər ɗa ma ku zhar kəɓa ka mwanki akwa laku tə Hyel vəi, ka ləkwa nu nggukər dza na ku səm dza ɗa, har tə da akwa bara nvwa ɗa. Mji shili nggwa an akwa hara sur səli kəga shili nvwa ɗa! Antə apani da ku ndəkərəngkər bwani na ku kəɓa ka ɗimikur tə da hara ni aka kəra ɗa. Təng tə da aɗi damitədzər səndə Hyel wa, antə Hyel zhar ɗa aka dzamər ɗimikur, ka da hara suayeri na aɗi kalkal wa.

Da akwa pəla abbər da ɗəɗu, amma da caku. Ata vəya ka da vəngkər səli aka Hyel na ka səli, na aɗi ba saka madi, da akwa vəngkər səli aka haptayeri na dludzi ka mda, wala ɗika, wala mwaɓiyayeri, wala suayeri na ana mwa ka yimər kuta ɗa, na aɗi ata ndzi ba saka madi wa.