Popular Bible Verses from Luùm 8

Share

Wo Dayà tomàŋ wèè e tɛ̀ɛ̀tɛ̀ɛ̀ anyùùŋ nyaŋ mànauŋ nyaŋ. Nyiŋ nàŋ yaà anyùùŋ nyaŋ wo Dayà naŋ nyààŋ wèè aŋ nyɛ̀nɛ̀ŋ e yèɛ wò manaŋ lɛ̀.

Mìŋ naŋ tùlìè e hààwe mɛ̀ jii kɛ̀ e nɛ̀ŋ gbiŋ fè wèè eim gè è mànàŋ Dayàa sùà. E fè pɛɛ è fàa ɔ̀ɔ̀ wɔ̀ŋ nyiiŋ gèe, aŋ màikà ɔ̀ɔ̀ anyùùŋ gbèègbèè ko àìjɛnɛ̀ŋ nyaŋ yaà maŋ gaàŋ gbeegbèè joo, miŋ dò nàŋ sɔ̀ e jàmaìŋ lɛɛ̀ ɔ̀ɔ̀ e yèɛ do nàŋ hnè lɛ, fèim gè è mànàŋ Dayàa sùà. Manɛ̀ŋ gààŋ maŋ ko fùùiŋ ɔ̀ɔ̀ ko dìlìi, manɛ̀ŋ bàne màŋ gbiŋ e ɗuunyaàŋ fè wi ɓɛ̀nɛ̀ŋ gè è mànàŋ Dayàa sùà è yèɛ yaà weè wi wo Kana wiɔ̀ Jisɛ̀ Kulaì sùà lɛ.

E ɗèwè guùŋ bi sùà wo Jìnàŋ Kanaà Dayà wò hnàŋ wèè wo wi kpuumàŋ, jòòpɛɛ è yààìŋ zɔ̀kpɔ̀ wèè eiŋ zòòlò Dayà. Esaɓù kɛ̀ e nyimàìŋ kɛ̀ kiìŋ è zoolàìŋ weè niŋ, kɛɛ wo Jìnàŋ Kanaà Dayà zoolà Dayà weè wi maŋ mìè bà sùà maŋ yè maŋ wo nyùùŋ gbiŋ fè ɓɛ̀nɛ̀ŋ gbòa màŋ.

Kiìŋ è naiŋ ɓɛ̀nɛ̀ŋ wòo e nyaàiŋ dè maŋ keì mɛɛ̀ŋ gbiŋ? Sèè wo Dayà nɔ̀ŋ weè wi, kɛ̀ ɓòò naŋ ɓɛ̀nɛ̀ŋ nɔ̀ŋ wo joo wi?

Weètii sèè è nɔ̀ŋ yɛi, e keì naàŋ jèè ànyùùŋ nyaŋ yaà àŋ bà nyiŋ bà wò Jisɛ̀ Kulaì sùà nyaŋ.

Sèè maŋ jii wi màŋ maŋ nɔ̀ŋ e gààŋ maŋ jùumù wi màŋ dìì, maŋ kpùnaŋ wi màŋ do nàŋ fɔ̀ɔ̀yɛ̀ maŋ jùumù sùà. Kɛɛ sèè maŋ jii wi màŋ maŋ nɔ̀ŋ e gààŋ wo Jìnàŋ Nɛɛmaàŋ dìì, wo Dayà do nàŋ nyɛ̀nɛ̀ŋ eiŋ kɛ̀ɛ̀nɛ̀ŋ wɔŋ nyiiŋ gèe e kìlà eiŋ nɔ̀ŋ ke jii fàa sùà.

E yìwìà maŋ keì nyìnga wi màŋ gbiŋ sùà, èiŋ ɓùlà, esàɓù Jisɛ̀ɛ sùà wo yèɔ mànàŋ wì wɔ.

Mìŋ naŋ haawè kɛ̀ e mɔ̀ɔ̀nɛɛ̀ŋ è yààìŋ naàŋ kɔ̀ɔ̀yɛ̀ dìì e teenga lɛɛ̀ sùà lɛ, e fè niŋ ɓɛ̀nɛ̀ŋ gbɛ̀ɛ̀nɛ̀ŋ è jòòwoɛ̀ wò Dayà do wi nàŋ tɔɔ̀ lɛ.

Ɓòò naàŋ naŋ wi ɓɛ̀nɛ̀ŋ gè è mànàŋ Jisɛ̀ Kulaìɛ sùà? È ɓɛ̀nɛ̀ŋ nɔ̀ŋ e keì nyìnga, ɔ̀ɔ̀ e mɔ̀ɔ̀nɛŋ, ɔ̀ɔ̀ wo nyùùŋ wo wi nimilà, ɔ̀ɔ̀ sèè è goiŋ kɛ̀ɛ̀nɛ̀ŋ nɛ̀ŋje, è goiŋ kɛ̀ɛ̀nɛ̀ŋ màŋ dèè wèè eiŋ kpàà, maŋ nyiiŋ wi màŋ nɔ̀ŋ e keì nyìnga dìì ɔ̀ɔ̀ e fàa?

Wo Dayà nyìmàŋ kɛ̀ kiìŋ nàŋ yaà maŋ jii wi màŋ sùà. Wò nyìmàŋ e ɗeweɛ̀ wo Jinàaŋ gongà lɛ, esaɓù kɛ̀, wo Jinàaŋ zoolà wèè anyùùŋ nɛ̀ɛ̀màŋ Dayà nyaŋ e ɗewe kiiɛ̀ wo Dayà manaŋ wèè wo nyɛ̀nɛ̀ŋ lɛ.

Anyùùŋ nyaŋ wo Jìnàŋ Kanaà Dayà toomàŋ sùà nyaŋ, nàŋ yaà aŋ jɔ̀à Dayà nyaŋ.

Anyùùŋ nyaŋ nyiniàŋ maŋ nyiiŋ gèe nyiŋ màŋ e mànàŋ ke kpùnaŋ nyiŋ nɛɛ̀ŋ sùà nyaŋ, àŋ gongà nɔŋ kèè maŋ kpèè nyiŋ bi màŋ. Anyùùŋ nyaŋ wo Jìnàaŋ toomàŋ sùà nyaŋ, gongà e kèè e nɛ̀ɛŋ wo Jìnàŋ Dayàa manaŋ aŋ nyɛ̀nɛ̀ŋ lɛ.

Tɔɔɓaa e fè ɓɛ̀nɛ̀ŋ nɔ̀ŋ wò Dayà, wo yèɔ gò wa kìlìà wò Jɔ̀àfèlàà wuŋ biɔ̀ kùàŋ feìŋ wɔ, wò nauŋ wa kiɛ̀ŋ e saaà gèe sùà wèè wo nɔ̀ŋ e kpùùmaŋ wèè yàwi nààŋ gbiŋ. Sèè wo Dayà naŋ wa tɛɛ̀ ɓɛ̀nɛ̀ŋ nyɛ̀nɛŋ, e gòiŋ haawè kɛ̀ wò wi ɓɛ̀nɛ̀ŋ kìɛ̀ŋ è nɛ̀ɛŋ gbiŋ wèè foo?

Wo Jìnàŋ Nɛɛmaàŋ toomàŋ aŋ jinàŋ wi nyàŋ kùàŋ sùà wèè wo woò wààŋ è yààìŋ aŋ jɔ̀à Dayà. Nààŋ è yààìŋ aŋ jɔ̀à Dayà, è doiŋ nàŋ yɛ̀mɛ̀ e kpùùmaàŋ wò naŋ bànè hàa wèè anyunùuŋ nyàŋ lɛ. Yèè yàwi pɛɛ doiŋ nàŋ yɛ̀mɛ̀ e nɛ̀ɛŋ wo Dayà naŋ bànè hàa wèè Jisɛ̀ Kulaì, màànààŋ nɔŋ wò naŋ niŋ yɛmɛ̀ lɛ. Kɛɛ sɔɔ̀ eiŋ kà e mɔ̀ɔ̀nɛŋ dìì wèè e keì sìàŋ nyɛ̀nɛŋ màànààŋ wo Jisɛ̀ Kulaì naŋ niŋ kɔ̀ dìì lɛ, wèè kɛ̀ yàwi pɛɛ e yɛmɛ̀iŋ e jòòwo màànààŋ wò naŋ niŋ yɛmɛ̀ lɛ.

Weètii sèè anyuùŋ kpùuŋ nɔŋ kɛ̀ɛ̀nɛ̀ŋ gòngo wèè e nɛ̀ɛŋ maŋ kpùnaŋ nyiŋ màŋ manaŋ lɛ̀, àŋ do nɔ̀ŋ aŋ joo koɓɛ̀ Dayài. Aŋ fè jɔ̀ɔ̀lɔ̀ màŋ sàwà Dayà maŋ dìì, e kìlà ngèè aŋ fè miŋ ɓɛ̀nɛ̀ŋ jɔ̀ɔ̀lɔ̀ dìì.

Manɛ̀ŋ maŋ gbiŋ wo Dayà naŋ banè maŋ e ɗuunyaàŋ lɛ, màŋ yaà fùlìè e teenga titiɛ̀ wèè wo Dayà tɔɔ̀ kɛ̀ ɓòò nàŋ yaà aŋ jɔ̀àuŋ nyàŋ.

Èiŋ nyìmàŋ kɛ̀ manɛ̀ŋ bàne màŋ gbiŋ e ɗuunyaàŋ kòò màŋ yaà nɔŋ gùlìè ɗìòsùà e keì nyìnga dìì màànààŋ nɔŋ wo jɔùŋ kuwo e keì nyìnga paŋgàà wò komo wo jɔ̀à lɛ.