Popular Bible Verses from Luùm 12

Share

Ɓɔ̀ nìŋ nyimèè wèè naŋ nyɛ̀nɛ̀ŋ è nɛ̀ɛŋ anyuùŋ gò kɛ̀ɛ̀nɛ̀ŋ hààwe nyàŋ woàìŋ kɛ̀ è yaà tɛ̀ɛ̀ wèè naŋ nyɛ̀nɛ̀ŋ lɛ è ɗuunyaŋ lɛɛ̀ dìì, kɛɛ tɔ̀ wo Dayà vɔɔnɔ̀ŋ e ɗeweɛ̀ nìŋ gongà lɛ. Tɛɛ̀ do nàŋ nyɛ̀nɛ̀ŋ naŋ tùàŋ maŋ nɔnɔŋ wèè naŋ nyìmàŋ e ɗèwè keì sìàŋ nyɛ̀nɛŋ yaà e yèɛ do nàŋ fɔ̀ɔ̀yɛ̀ Dayà jii lɛ̀.

Nyɛ̀iŋ nààŋ wùìyaim nyàŋ, wo Dayà naŋ wi tɔ̀ɔ̀ ke nyowo gbee e ɗewe kii zimgbe sùà. Weètii mìŋ yààìŋ pɔɔwɔ e tɔ̀ɔ̀nyaàŋ sùà, wèè naŋ kìɛ̀ŋ maŋ kpùnaiŋ màŋ ko nɛ̀ɛ̀uŋ niìŋ e sàà gè nɛɛmaŋ yèè wɔŋ nyiiŋ gèe sùà. Sìaìŋ ke di wèè niŋ tòmo weèuŋ e kìlà e fɔɔyɛ̀uŋ jii. Tɛɛ̀ nàŋ yaà e zòòlo kɛnɛɛ̀ wèè naŋ kiɛ̀ŋ.

Tɔ̀ ke jii tùlia mɔɛ̀ŋ ke nɔ̀ŋ e zɔlɔ̀ sùà, sèè mùŋ nɔ̀ŋ e keì nyìnga sùà, kɛ̀ɛ̀nɛɛ̀ŋ ke jii tɔumtɔ̀ùm yèè muŋ zoolò e teenga gbiŋ.

Ɓɔ̀ nìŋ nyimèè wèè è gààŋ è keì naanààŋ è doiŋ gbùwò diɛŋ, kɛɛ ɓùlaìŋ niŋ e yìwìà e keì sìàŋ nyɛ̀nɛŋ sùà.

Mànaìŋ aŋ dàwi tɛ̀ɛ̀ mààŋ aŋ wùìyà ke kpòò guùŋ. Yèè nɔ̀iŋ e wùànàŋ sùà wèè niŋ tɔɔ̀ e ɓɛ̀ɛ̀jàa koɓɛ̀ aŋ dàwiiŋ nyàŋ.

Manàŋ aŋ dàwium nyàŋ, e tɔ̀ɔ̀nyaàŋ sùà. Wuàŋ e keì naanààŋ nyɛ̀nɛŋ, dìkià muàŋ bi koɓɛ̀ e keì sìàŋ nyɛ̀nɛŋ.

Nyɛnɛ̀ŋ e tɛ̀ɛ̀tɛ̀ɛ̀ɛ gbiŋ mùŋ kuwa maŋ nyɛ̀nɛ̀ŋ lɛ, wèè anyùùŋ nyaŋ gbiŋ aŋ nɔ̀ŋ ke jii fàa sùà weèum.

Nyɛ̀iŋ nààŋ wùìyaim nyàŋ, ɓɔ̀ nìŋ giiyà wò nyùùŋ è kpàŋ kei naanààŋ, kɛɛ dàngè wo Dayà nyɛ̀nɛ̀ŋ niŋ weèum. Wɔŋ fɛ̀ì Dayàa naŋ woò wààŋ, “Miàim wo Kanaà Dayà do nàŋ gììyè e kpàŋ koɓɛ̀ anyùùŋ nyaŋ naŋ jàà aŋ dàwi nyiŋ nyàŋ e nànàŋ nyaŋ e tɔ̀ɔ̀nyaàŋ sùà.”

Ɓɔ̀ mùŋ nɔ̀ŋ wò nyuùŋ jɛ̀kɛ, kɛɛ tòmò tɛ̀ɛ̀. Zòòloò sɛmɛ e wùànàŋ gbee sùà e teenga gbiŋ wèè wo Jìnàŋ Nɛɛmaàŋ nɔ̀um maŋjɛ̀wɛ, e kìlà muŋ nɔ̀ŋ wo ɗo wèè wo Kanaà Dayà.

Kà nyìmàŋ kɛ̀ wo Dayà naim kìɛ̀ŋ e tɛ̀ɛ̀tɛ̀ɛ̀uŋ nɛ̀ zimgbe, yèè weètii tɔ̀ miŋ woò nyɛ̀iŋ nààŋ bà guùŋ gbiŋ kɛ̀, ɓɔ̀ mùŋ ɓemè muàŋ bi gbee è do nìàŋ è ɗeweɛ̀ mùŋ yaà lɛ, tiŋ zà muŋ fè yɛi. Tòòmoò e gòngo siaŋ yèè muŋ gbaì muàŋ bi e nyaàiŋ dè e hààweɛ̀ wo Dayà naum kiɛ̀ŋ lɛ.

Sèè wo nyùùŋ wò jààùm e nànàŋ, ɓɔ̀ mùŋ giiyàuŋ è kpàŋ keì naanààŋ. Kàmè ɗewe wèè muŋ nyɛ̀nɛ̀ŋ e yèɛ anyùùŋ nyaŋ gbiŋ naŋ gongò kɛ̀ è yaà tɛ̀ɛ̀ lɛ.

Nɔ̀ŋ wo nyuùŋ mɔ̀ɔ̀nɔŋ koɓɛ̀ anyùùŋ nyaŋ gbiŋ. Ɓɔ̀ mùŋ ɓemè muàŋ bi gbee yèè ɓɔ̀ mùŋ gongò kɛ̀ màŋ nyìmàŋ e nɛ̀ŋ e nìàŋ anyuùŋ gbànaŋ nyàŋ. Dèèyeè muàŋ bi koɓɛ̀ anyuùŋ gò kɛ̀ɛ̀nɛ̀ŋ nɛ̀ŋ nyaŋ.

Wɔŋ fɛ̀ì Dayàa naŋ ɓɛìŋ woò wààŋ, “Sèè e jìè è nɔ̀ŋ aŋ jooum nyàŋ, kìɛ̀ŋ nyiŋ e nɛ̀ŋje aŋ jè. Sèè ke jòòmàì nɔ̀ŋ nyiìŋ, kìɛ̀ŋ nyiŋ maŋ màì aŋ tìà. Sèè nìŋ nyɛnɛŋ tɛɛ̀, nìŋ do nàŋ nyɛ̀nɛ̀ŋ e sàngè mààŋ e hmɔɔ̀ŋ jɛi e nyiŋ jɛ̀ì maŋ ɗì.”

Zòòloò wo Dayà wèè wo kpuumàŋ anyùùŋ nyaŋ jààùm e nànàŋ nyaŋ. Dàwè wo Dayà wo kpuumàŋ nyiŋ, kɛ̀ɛ̀ ɓɔ̀ wò gboò nyiŋ. Sèè mùŋ yɛmɛ̀ anyùùŋ àŋ nɔ̀ŋ zɔlɔ̀ sùà, muàŋ pɛɛ nɔ̀ŋ zɔlɔ̀ sùà weè nyiŋ. Sèè mùŋ yɛmɛ̀ anyùùŋ aŋ nɔ̀ŋ gulie, muàŋ pɛɛ golà weè nyiŋ.

Kìɛìŋ kpùùmaŋ koɓɛ̀ anyùùŋ nɛ̀ɛ̀màŋ Dayà dàwiiŋ nyàŋ kuwà nɛ̀ŋ nyaŋ, e kìlà niŋ jaà aŋ nyùùnèènyɛiŋ kùàŋ dìì tɛ̀ɛ̀ maŋ gbooiŋ màŋ sùà.

Maŋ kpùnaŋ wi màŋ kuwa maŋ suono suono zimgbe, kɛɛ maŋ gbiŋ tomàŋ gbàgbà. Yɛi nɔŋ yàwi pɛɛ è yààìŋ. È kùwàìŋ maŋ suono suono zimgbe maŋ kpùnaŋ wi màŋ sùà, kɛɛ è yààìŋ nɔŋ guùŋ ke kpùnàŋ Jisɛ̀ Kulaìɛ sùà, yèè ke kpùnàŋ guùŋ aŋ dàwi wi nyàŋ sùà.