Popular Bible Verses from ᕈᒪᓇ 1

Share

ᐛᔅ ᑕᐸ ᓂ ᐱᒪᒥᓯᑐᑕᓐ ᒥᔽᒋᒧᐅᓐ᙮ ᐊᐅᒄ ᐅᔭ ᒥᔽᒋᒧᐅᓂᔪᐤ ᓱᒃ ᐃᔭᐱᒋᑕᑦ ᒋᓴᒪᓂᑐᐤ ᒐᒋ ᐊᔭᔨᒋ ᐱᒪᒋᐃᑯᓯᐅᓂᔪᐤ ᒥᓯᐛ ᐊᐛᔪᐛ ᑲ ᑕᑈᑎᒥᔨᒋ᙮ ᓂᔅᑎᒻ ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ ᒋ ᐛᐎᑎᒧᐛᑭᓄᐅᔪᐛ ᒐᒃ ᐊᓂᔭ ᐊᑲ ᒍᐤ ᐃᑎᔅᑲᓇᓯᔨᒋ ᒂ ᐛᐎᑎᒧᐛᑭᓄᔨᒋ᙮

ᐊᑯᑕ ᑭᔭ ᒥᔽᒋᒧᐅᓂᒡ ᐛᒋ ᒋᔅᒐᔨᑎᒥᐃᑯᔭᐧᒄ ᑕᓐᑕ ᐛᒋ ᑯᐃᔅᑯᓇᑯᐊᑦ ᒋᓴᒪᓂᑐᐤ ᐊᐛᔪᐛ ᐎᔾ ᐃᔅ ᐊ ᑕᑦ᙮ ᐊ ᑕᑈᔭᔨᒪᑦ ᐊᐛᓐ ᒋᓴᓴ ᐊᑯᑕ ᒥᒄ ᐛᒋ ᑯᐃᔅᑯᓇᑯᐊᑭᓄᐅᑦ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᑕᑈᑎᒧᐅᓂᔪᐤ ᐱᒪᒋᐃᑯᐤ ᐊᐛᓐ, ᑭᔭ ᐊᐅᒄ ᐅᔭ ᒐ ᒋᐛᑕᐃᑯᑦ᙮ ᒧᔭᒻ ᐊᑎᔅᑕᒡ ᒥᓯᓇᐃᑭᓂᒡ, ᐊᓐ ᑲ ᑯᐃᔅᑯᓇᑯᓯᑦ ᑕᑈᑎᒧᐅᓂᒡ ᐅᒡ ᐊᐅᒄ ᒐ ᐱᒪᑎᓯᑦ᙮

ᐊᑎ ᐊᑲ ᐅᒋ ᒋ ᐛᐱᒪᑭᓄᐅᑦ ᒋᓴᒪᓂᑐᐤ, ᒥᓯᐛ ᑕᓐ ᑲ ᐃᓯ ᑕᑦ ᐅᔭ ᐊᔅᒋᔪᐤ ᐊᑯᑕ ᒐᒋ ᐅᒋ ᐱᔭᑭᔅᒡ ᓂᔅᑐᐅᓂᒺᒡ ᐊᐛᓐᒋ ᐅᑲᒋᒐ ᓱᐧᑲᑎᓯᐅᓂᔪᐤ ᑭᔭ ᐊᑯᑕ ᒐᒋ ᐅᒋ ᒋᔅᒐᔨᒪᒡ ᑕᑈ ᐊ ᒋᓴᒪᓂᑐᐎᔨᒋ᙮ ᓇᒪ ᒪᒃ ᒋᑭ ᒋ ᑕᐤ ᐊᐛᓐ ᐊᑲ ᒋᔅᒐᔨᑕᐧᒃ ᐊ ᑕᔨᒋ ᒋᓴᒪᓂᑐᐛ᙮

ᐛᔅ ᒪᐅ ᑲ ᐃᓯᓇᒂᒡ᙮ ᒋ ᒋᔅᒐᔨᑎᒧᒡ ᑕᑈ ᐊ ᑕᔨᒋ ᒋᓴᒪᓂᑐᐛ, ᒥᒄ ᓇᒪ ᐅᒋ ᐎ ᒋᔅᑕᔨᒪᐅᒡ ᑕᓐ ᒋᐸ ᐃᓯ ᒋᔅᑕᔨᒪᐅᒡ ᑭᔭ ᓇᒪ ᐅᒋ ᐎ ᓂᓇᔅᑯᒪᐅᒡ᙮ ᐅᔭ ᐊ ᐃᑎᒡ ᓇᒪ ᐱᐸᔅᐱᓇ ᐅᒋ ᐃᑕᔨᑕᑯᓂᔪᐤ ᑕᓐ ᑲ ᐃᑕᔨᑕᒡ ᐊ ᐃᑕᔨᑕᑯᓯᔨᒋ ᒋᓴᒪᓂᑐᐛ ᑭᔭ ᓇᒪ ᓇᔅᒡ ᑯᐃᔅᒄ ᐅᒋ ᐃᓯ ᑭᓄᐛᐸᑎᒧᒡ ᒐᒂᔪᐤ᙮

ᒂᔅᒋᓂᒧᐛᐅᒡ ᐊᓂᔭ ᑕᑈᐅᓂᔪᐤ ᒋᓴᒪᓂᑐᐛ ᑲ ᐱᔅᑎᓂᒥᔨᒋ ᒐᒋ ᒋᔅᒐᔨᑕᑭᓄᐎᒡ᙮ ᒥᔅᑯᒡ ᒪᒃ ᑭᑭᒋᔭᐅᓂᔪᐤ ᒋ ᑕᑈᑎᒧᒡ᙮ ᐃᔅᐱᔅ ᐎ ᐊᓂᔭᔪᐛ ᐊᐛᔪᐛ ᒥᓯᐛ ᒐᒂᔪᐤ ᑲ ᐅᓯᑕᔨᒋ ᒐᒋ ᐊᔭᒥᐊᔅᑐᐛᒡ, ᐊᓂᔭᔪᐛ ᒐᒂᔪᐛ ᑲ ᐅᓯᑕᔨᒋ ᐊᐅᑯᓂ ᐊᓂᔭᔪᐛ ᐊᔭᒥᐊᔅᑕᒡ᙮ ᒋᓴᒪᓂᑐᐤ ᒪᒃ ᐊᐅᒄ ᑕᑈ ᑎᔭᐱᒐᔨᑕᑯᓯᑦ ᑲᒋᒡ ᒐᒋ ᒪᒥᒋᒪᑭᓄᐅᑦ᙮ ᐊᒥᓐ᙮

ᐛᔅ ᐊᐅᑯᐤ ᐊ ᓄᑯᑕᑦ ᒋᓴᒪᓂᑐᐤ ᒋᒋᒋᓯᑯᒡ ᐅᒡ ᑕᓐ ᐊᔅᐱᔅ ᒥᔅᑎ ᒋᔄᐃᑯᑦ ᒥᓯᐛ ᐊᐛᔪᐛ ᐊᓂᔭ ᐅᒋ ᐊ ᒥᒐᑎᓯᔨᒋ ᑭᔭ ᐊᓂᔭ ᐊᑲ ᓇᔅᒡ ᐊᐱᑕᔨᒥᑯᑦ᙮ ᐛᔅ ᐊᓂᔭ ᐊ ᒥᒐᑎᓯᒡ ᐊᐛᓐᒋ ᓇᑲᐊᒧᒡ ᐊᑐᐎᔅ ᒐᒋ ᒋᔅᒐᔨᑕᑭᓄᐎᒡ ᑕᑈᐅᓂᔪᐤ᙮

ᐅᔭ ᒪᒃ ᐊ ᐃᑎᒡ ᐊᐛᓐᒋ, ᐊᑲ ᐎ ᒋᔅᑕᔨᒪᒡ ᑭᔭ ᐊᑲ ᐎ ᓂᓇᔅᑯᒪᒡ ᒋᓴᒪᓂᑐᐛ ᐊᑯ ᐊᓐᑕ ᑲ ᐃᓯ ᐱᔅᑕᔨᒥᑯᒡ ᐅᐎᓂᓱᐤ ᒥᒋ ᓂᑐᐛᔨᑎᒧᓂᐛᒡ ᐃᔅ᙮ ᐛᐛᒡ ᐃᔎᐅᒡ ᒋ ᒂᔅᒋᐱᔨᑕᐛᐅᒡ ᑕᓐ ᐊᓂᔭᔪᐤ ᒋᓴᒪᓂᑐᐛ ᑲ ᐃᑎᔅᑕᔨᒋ ᐊ ᒥᔪᓇᑯᓂᔨᒡ ᒐ ᐃᓯ ᒋᔅᒐᔨᒥᑐᔨᒋ ᓇᐸᐛ ᑭᔭ ᐃᔎᐛ ᐊᓐᑕ ᓂᐳᐅᓂᒡ᙮ ᐊᐅᑯᓐ ᑲ ᐃᑎᒡ ᑭᔭ ᓇᐸᐅᒡ᙮ ᒋ ᓂᑭᑎᒧᒡ ᑕᓐ ᐊᓂᔭᔪᐤ ᒋᓴᒪᓂᑐᐛ ᑲ ᐃᓯ ᒥᔨᑯᒡ ᒐᒋ ᐃᓯ ᒋᔅᒐᔨᒪᒡ ᐃᔎᐛ᙮ ᐊᑯ ᒪᒃ ᓇᔅᒡ ᐊ ᓱᒋᐱᔨᒡ ᐎᔨᐛᐤ ᐊ ᒥᒋ ᓂᑐᐛᔨᒥᑐᒡ᙮ ᐊᓂᔭ ᒪᒃ ᐊ ᐃᑐᑕᑐᒡ ᓇᐸᐅᒡ ᐊᑲ ᓇᔅᒡ ᓴᓯᑲᓐ ᐃᓯ ᐛᐛᓯᐊᐊᑭᓄᐎᒡ ᑕᓐ ᐊᓂᔭᔪᐤ ᒧᔭᒻ ᐊ ᐃᓯᓇᑯᓂᔨᒡ ᒐᒋ ᐃᓯ ᐛᐛᓯᐊᑭᓄᐎᒡ᙮ ᐊᑲ ᐊᐱᑕᔨᑕᒡ ᐊᐛᓐᒋ ᑕᓐ ᐊᓂᔭᔪᐤ ᑯᐃᔅᒄ ᒋᐸ ᐃᓯ ᒋᔅᒐᔨᒪᐅᒡ ᒋᓴᒪᓂᑐᐛ ᑭᔭ ᐊᑲ ᐎ ᐊᐱᑕᔨᑕᒡ ᐅᐱᒪᑎᓯᐅᓄᐛᒡ ᐊᑯ ᒂ ᐃᑐᑕᑯᒡ ᓇᔅᒡ ᒐ ᐊᑲ ᒋ ᑯᐃᔅᑯᓇᑯᓂᔨᒡ ᑕᓐ ᐊ ᐃᑕᔨᑕᒡ ᒐᒋ ᐃᑎᒡ᙮ ᐊᑯ ᒪᒃ ᐊ ᐃᑐᑕᒡ ᐊᓂᔭᔪᐤ ᒐᒂᔪᐤ ᐊᑲ ᒋᐸ ᐅᒋ ᐃᑐᑎᒧᒡ᙮

ᒧᔭᒻ ᓇᔅᒡ ᐊ ᑭᒐᑕᐛᔨᑕᒡ ᒋ ᐃᑕᔨᑕᑯᐃᓱᐅᒡ ᒥᒄ ᒪᒃ ᓇᔅᒡ ᒋᔎᐧᑲᓐᒡ ᐃᑕᔨᑕᑯᓱᐅᒡ᙮ ᐃᔅᐱᔅ ᐎ ᒐᒋ ᐊᔭᒥᐊᔅᑐᐛᒡ ᑲ ᒋᔅᑕᔨᑕᑯᓯᔨᒋ ᒋᓴᒪᓂᑐᐛ ᐊᓂᔭ ᑲᒋᒡ ᒐ ᑕᔨᒋ, ᐃᔭᐱᒡ ᐊᓂᔭᔪᐛ ᒥᓂᑐᐧᑲᓇ ᒐ ᓂᓱᐅᓇᑎᓯᔨᒋ ᐊᔭᒥᐊᔅᑐᐛᐅᒡ, ᐊᓂᔭᔪᐛ ᐎᔨᐛᐤ ᑎᐱᔨᐛ ᐊᒋ ᐅᓯᐊᒡ ᒥᔅᑎᑯᒡ ᑭᔭ ᐊᓯᓂᒡ ᐅᒡ᙮ ᐊᓂᔭᔪᐛ ᒪᒃ ᒥᓂᑐᐧᑲᓇ ᑲ ᐅᓯᐊᒡ ᒧᔭᒻ ᓇᐸᐛ ᒪᒃ ᐱᔭᓯᓴ ᒪᒃ ᐊᐛᓯᓴ ᒪᒃ ᓂᓇᐧᑯᐤ ᐊ ᐃᓯᓇᑯᓯᔨᒋ ᒥᓐᑐᓴ ᐊᐅᑯᓐ ᑲ ᐃᓯᓇᑯᐊᒡ᙮