Popular Bible Verses from १ पत्रुस 2

Share

जेलाई ते हिताव माःक। जे छाँतिसिउ ओथोर, राजाराए याराजाए ओसेवा दान्‍या पुजारीर, ओल उमिनताव छैंव जात, परमेस्‍वरए ओथामिचिउ उमींर ज़। है जैद जे गेप्रभुए उगुनर प़ाइँदा सथास्‍न्‍याए जूँनी जेलाई चुम चुमोनी पले·द अचम्‍बलाव ओज़गैल झाःचिक्‍यो।

गेलाई ‘पाप दान्‍यात सिधुव मिताव जैसिद परमेस्‍वरए उयुँलाव मिताव य़ेन दान्‍या घतारक’ लिद क्रुसत तङ्गैसिद गेदोव पाप भरी ओल ज़ घुर्द्यासिक्‍यो। है जैद नोए ओघाइनी ज़ जे जेगराँके। जे ङ़ादाकिन ङोइव बेधा स्‍यासोर जेल्‍यो, अब ते पाथस नैज़्‍याव जेर्गे गावलाए ओल्‍योदा ओल्‍द हुद जेले।

जे ङ़ादा कान्‍ल ज़ मागनिसिउर जेल्‍यो। आज्‍याल ते परमेस्‍वरए उमींर ताद जेले। ङ़ादाकिन य़ालो उयुँ मादैवर जेल्‍यो, आज्‍याल ते य़ालो उयुँ दैद जेनै।

साःरो जुनील पाखो तानान्‍याए जूँनी भाउज़ाए नुइँ उखिम्‍ज़्‍याव मिताव जे ब परमेस्‍वरए छैंव ओपाँए ओअर्थ खिम्‍च्‍यो।

आव मानुवात खासिद लिज़्‍याव ङायुँलाव ङानैं ङामेंर, जेस ङाबिन्‍ती लिज़्या — जेयुँ जेमानैधुज़्‍याव माचाहिउ य़ेनरालाई वैंव ताके। नो पाँराए युँस लरैं दोज़्‍यार। यायुँ माहुप्‍ज़्‍यावराए ङ़ाक चाव य़ेन सतैंचिके। हो ताकिन ची सुवाराए जेमिन बले·द यायाचिदी ब परमेस्‍वर फरी उहुन्‍या छ्याम जेय़ेन रँःद ‘आवराए याय़ेन ते चाव ची ओल्‍यो’ लिद परमेस्‍वरए उमिन ब सघ्योःन्‍या लेर।

जे ब जींदो लुँ स्‍यासो जैसिद परमेस्‍वरनिकाव ताज़्‍याव झ़िमत ऱीम्‍सिहुचिके। जे नल छैंव पुजारीर ताद परमेस्‍वरए ओपैंज़्याव युँनिकाव पुजार येसु ख्रीसनी चरैःचिके।

है जैद मादान्‍या य़ेन भरी ऱासो ताके — धुतैन्‍या, कप्‍तैं दान्‍या, मी तून्‍या, छुलैं पुलैं दान्‍या — आव भरी ऱास्‍च्‍यो।

गेप्रभु येसुए ल्‍योदा हुचिके, हो गजलाव जींदो लुँ ज़। नोलाई झन मिँराए ‘माचाहिए’ लिद ख्याकेर। खाली परमेस्‍वरए ते नोलाई छाँतिद बनै ओएः ल्‍यो थ·रैक्‍यो।

जे फुर्सुल जेतावए हितावनी ज़ दोच्‍यो। खाली, ‘सुए उधूँल ज़ गेमाले’ लिद कोभादा बान्‍या माःक, बुरू परमेस्‍वरए उधूँल लिद ओय़ेन दोच्‍यो।

यायुँ माहुबोराए अऩाकलाव माचाहिउ यापाँर चाव जेय़ेनए थाम थुम जैन्‍या परमेस्‍वरए उयुँ लिज़्‍या।