Popular Bible Verses from Budie Taatina 12

Share

Bula banwani bádi-nwu lɛlɔ ɔkɛnku Koƒonu Ubi ubugya lɛlɔ ku litemi geen lɛni kenye bédie lɛlɔ. Ɔsika bénye kagyumana ka beti bana ngba bakpa.

Ɔmmɔ kama línu lɛdi bonwu lɛdi na katɔ na lɛɛsu lɛnini, “Ɔƒɛni na Katɔti ngba bɔƒɔ ku nwuna ɔyikun ku lɛgadi lɛ́da lɛ́lɛ. Na nwuna Ukyuli Ɔƒunadi ɔmmɔ kenyekɔ lɛnɔ káda kálɛ. Ɔsika bábɔku baƒɔtaadine ukisine ɔmmɔ bálɛku katɔ mmɔ. Anwu muunye bula Katɔti anumi usien ku ɔƒɛ taawia baƒɔtaadine bammɔ litemi.

Na bábɔku liƒu kɔlakpi kɔmmɔ béboku kalɔ. Aku ndi kɔlakpi kɔkukudi bonwu kɔni baalɔ ukisine ɔmmɔ iye Satan, na ɔɔtɔ́lɔ kayawi kemodi ƒui. Bábɔku anwu ku nwuna batu ƒui bábava kalɔ lɛlɔ mɛni.

Anwuɔsu lɛlɔ lɛyɔ amii bani nkya katɔ mmɔ ƒui! Nsu muute kalɔ ku ɛpu ala ƒui bɔbuɛ! Ɔsika Satan ɔ́ɔda ɔ́lɛ-mii lɛlɔ. Na úti kɔnyi geen, ɔsika ɔgyi ka uwi klukui kani nébu-nwu.”

Amu na kekpo kálɛ na katɔ. Na Katɔti ɔtu unengudi ɔni ndi Mikael ɔ́tɔnku Katɔti batu bakladi na báta, na ama ku liƒu kɔlakpi kɔmmɔ ku kuna batu lɛnɔ békpo.

Mmɔ ni, kɔlakpi kɔmmɔ kúti kɔnyi kɔ́kya uleku ɔmmɔ geen, na kɔ́gyu kɔ́tɔlɔ kúsie kútékpoku nwuna bawɔ bakladi bani muunú Katɔti litemi na beedie Yesu kenye.

Amu na akɔla ala budie taatina bonwu adi áda álɛ kayaa. Na ɔƒɛ ɔ́ka ɔ́mana uleku ɔdi aani kɔdi kalɛ, na kɔbuli kɔkya-nwu lɛgba kalɔ. Na úbi ayabi leevu-inyɔ kagabwa kadi lili. Ɔda kaƒɔ. Na ka uwi údu ka ɔwɔ ni, ɔ́va momoomo ka uunú ɔlɛ ɔsu.

Na uleku ɔmmɔ ɔ́wɔ ɔnanabi ɔni madi kayawi ƒui lɛlɔ ku ɔyikun kpakplaa. Nsu Katɔti Kɔyu kúkpeli ubi ɔmmɔ kɔ́ƒɔ na kúti-nwu kúsienku Katɔti na nwuna lɛgaboku anumi. Na uleku ɔmmɔ úkeli úsie ketele kemmo likpo lɛni na Katɔti ɔ́klibi úse-nwu. Mmɔ na badubo-nwu lɛlɔ bɔnu emeyi apim unwi eti alɔ ku leevu.

Amu na lɛ́nu akɔla ala bɔnu bɔbambadi lɛnɔ! Liƒu kɔlakpi bonwu kɔdi négyie geen kɔ́da kɔ́lɛ kayaa. Na kubo eli maatɛ ku ese leevu. Na kagabwa kebi-ku lili biala lɛlɔ. Na kútiku kayaa ayabi lɛkpa lɛtɛdi ƒui ku nwuna ɔka úbo úbewi kalɔ lɛlɔ. Kunye uleku ɔmmɔ lɛtɔtɔ kalɛ na kuti ubi ɔni na uleku ɔmmɔ wawɔ ɔkun si ɔ́nya ɔ́wɔ-nwu.

Amu na Katɔti úte uleku ɔmmɔ aasɛ bonwu avwi kalɛ na uveyi uteesie nwuna keliekɔ na ketele kemmo. Mmɔ na badubo-nwu bɔgyumana akwa atɛ ku kakɛ ɔsiku kɔlakpi kɔmmɔ kudɔ. Ɔmmɔ kama ni, kɔlakpi kɔmmɔ kútuo ntu pii bɔdi bɔ́lɛku nwuna kenye kemmo kalɛ na bɔgba butéƒie uleku ɔmmɔ na butiku-nwu bɔtɔlɔku. Nsu kalɔ kébunku uleku ɔmmɔ na kébimi kenye na káni ntu bɔni nálɛ bɔ́si kɔlakpi kɔmmɔ kenye kemmo ƒui.