Popular Bible Verses from Mateo 24

Share

Likpidi bɔbla lɛdubo bumomo na baƒɔtaadine pii basɔ baláyɔ lɛlɔ. Na ukyuli ɔni ndubɔkya ɔkplu utálɛ kawɔlɔkɔ ni, Katɔti ɔdubute-nwu ngba ƒui.

Na bekyuli badubɔkɔ Katɔti lɛga bɔdi litemi buni lɛmmɔ lɛsa na kayawi ƒui kalɛ na ukyuli biala ɔkɛ kuƒi unu-ni asa na kawɔlɔkɔ kammɔ kedu.

Bɛdubunu kekpo ku kekpo etemila. Nsu bitaya na ɔtɔtɔ ɔgyu-mii. Ɔdi ka ala amɛni ƒui udu alɛ, nsu ulátina ka kawɔlɔkɔ kammɔ kéedu tɔ.

Kalɔ kadi bekyuli badubɔta na bekpoku babambadi. Na lɛga kadikɔ kadubukpoku kabambadi. Na kɔka kɔdububo na ekpo ekpo. Na kalɔ lɛnɔ kadubo butaakunku na ekpo ekpo. Ala amɛni ndubuse kalɔ aani kalɛ na kawɔƒɔ keesé uleku kalɔ ku bɔdu.

Katɔ ku kalɔ kadubɔvi, nsu mina etemila anya aaadubo bɔvi kudii.

Bekyuli pii badubuti mina lɛnyi bebo babasu-mii banini, ‘Ami ndi Ukyuli Ɔƒunadi ɔmmɔ’ na batɔlɔ bekyuli pii.

“Bina bekisine badubɔya na beƒie-mii bete ɔma benengu na batɛku-mii litemi. Na bani-mii kɔtu na badu-mii. Kadi ƒui bekyuli badubukisi-mii, ɔsika bɛdi mina batɛyane. Bekyuli bani náƒɔ-mi bádi pii badubunwini kama bakya-mi uwi ɔmmɔ kemmo. Na badubɔkya bana bakpana kakya na beteekisi lɛlɔ. Bekyuli pii badubɔta banyi ɔkɔ banii ama ndi Katɔti kenye bediene na batɔlɔ bekyuli pii.

Yesu ɔ́su-ma ɔnini, “Bɛsia anu kaduɛ na ukyuli ɔdi ulátɔlɔ-mii.

Lɛni kani na ɔlɛka amii lɛnɔ bilie kagyumana, ɔsika ami Ukyuli Ɔyawine Ubi ndububo mbeyu-mii lɛtu.

“Anwuɔsu bilie kagyumana, ɔsika bɛɛɛgyi limeyi lɛni na bina Unwoti ɔdububo.

“Ukyuli ɔdi ɔɔɔgyi limeyi iye uwi ɔni kemmo na ami, Ukyuli Ɔyawine Ubi, nsɔ ndubo. Katɔti batu baaagyi, na ami lɛnɔ lɛɛɛgyi. Ati lɛti kani ngyi.

Ɔsika bekyuli badubɔta banyi ɔkɔ banii ama ndi Ukyuli Ɔƒunadi ɔmmɔ, na badi lɛnɔ basu banii Katɔti kenye bediene badi. Na badubɔbla akɔla budie bɔtina ebendi lidu lidu, kalɛ na si nka bakana ni, beti batɔlɔ bekyuli bani na Katɔti ɔ́ƒuna úse muedi.

Ami, Ukyuli Ɔyawine Ubi, ndubo buse aani kalɛ na ɔ́lɛ na Noa uwi. Uwi ɔmmɔ asa na ɔnantu wana waƒɔ kalɔ lɛlɔ ƒui ni, bekyuli bákya bátaadi taani. Na banana ku beleku beeti lɛlɔ útálɛ limeyi lɛni na Noa útéduo ɔkɔlɔ ɔmmɔ kemmo. Nsu bátati lɛla lɛni mɔɔlɛ́ úti útédu uwi ɔni na ɔnantu ɔ́na ɔ́gbala-ma ƒui. Lɛni kani na Ukyuli Ɔyawine Ubi bubo lɛnɔ bɔdubɔbla.