Popular Bible Verses from Aisaia 60

Share

Fedege agoane, Yelusaleme, di wa:legadole, eso agoane diga:ma. Hina Gode Ea hadigi da dima hadigisa.

Fifi asi gala fi da dia hadigi ba:sea, dima gilisimusa: dawa:mu. Amola dia hou da hehebolo mabe galu defele, amo ba:sea, hina bagade ilia da dima gilisimusa: dawa:mu.

Fifi asi gala eno da gasi dunasi amoga dedeboi dagoi ba:mu. Be Hina Gode Ea hadigi da dima hadigimu. Ea hadigi esalebe da dima dafulili lelumu.

Amola dia baligili fonobahadidafa sosogo fi da alele, gasa bagade fifi asi gala defele ba:mu. Na ilegei eso da doaga:sea, Na da amo hedolowane hamomu. Na da Hina Gode!

Eso da esomogoa hadigisa. Be amo esoga, eso da dima bu hame hadigimu amola gasia, oubi da dima bu hame hadigimu. Bai Na, Hina Gode da dima eso huluane hadigilalumu. Na gadodafa hadigi hou da dima hadigiwane dialumu.

Dia da:i diosu eso da dagomu. Na, Hina Gode da dima eso huluane hadigilalumu. Eso amola oubi amola da dagomu. Be Na hadigi da hamedafa dagomu.

Di da amo ba:sea, hahawane bagade ba:mu. Di da hahawane fofogadigiba:le, yagugumu. Bagade gagui fifi asi gala ilia liligi da dilima gaguli manebe ba:mu. Soge amo da hano wayabo bagade na:iyadodili diala, amoga ilia liligi noga:i dima gaguli manebe ba:mu.

Hou wali hamonana, amo ba:ma:ne ba:le gagama. Dia fi dunu da buhagimusa: gilisisa. Dia gofelali da soge sedaga ganini buhagimu. Didiwi da mano fonobahadi defele, enoga ouga:ne, oule misunu ba:mu.

Dia fi dunu da hou moloidafa fawane hamomu amola ilia da eso huluane Isala:ili soge gagulalumu. Na da Na gasa bagade hou amoga Na fi hahamoi amola Isala:ili sogega ili bugi dagoi, dunu huluane da ba:mu.

Dia da gegesu halasu bu hame nabimu. Dia soge da bu wadela:lesi hame ba:mu. Na da di ouligimu, amola gasa bagade gagoi ea gaga:i defele, di gaga:mu. Amola Na da di gaga:iba:le, dia da Nama nodomu.

Fifi asi gala hina bagade ilia da dima ilia noga:i liligi gaguli misa:ne, dia logo ga:su da gasia amola esoga hamedafa ga:si ba:mu.

Ga:mele dada:lesu bagade da Midia:ne amola Ifa amola Siba amoga gouli amola gabusiga: manoma liligi gaguli manebe ba:mu. Dunu da sia: ida:iwane gala amo Hina Gode Ea hamobe, amo fifi asi gala ilima hahawane adomu.

Hina Gode da fedege agoane, Yelusaleme amoma amane sia:sa, “Ga fi dunu da dia gagoi bu gagumu, amola ilia hina bagade, ilia da dima hawa: hamosu dunu agoane ba:mu. Na da ougiba:le, dima se iasu. Be wali Na da Na asigi hou amola gogolema:ne olofosu dima olelemu.

Di da moilai bai bagade yaloi dialu, amola dunu eno ilia da di higa:i. Di da wadela:lesi dagoi ba:i. Be amo hou fisili, Na da di afadenene, bu bagade amola noga:i ba:su amo di bu hahamomu. Amasea, di da eso huluane hahawane hou fawane ba:mu.

Fifi asi gala amola hina bagade, ilia da ame da ea manoma dodo maga:me iaha, amo defele di asigiliwane ouligimu. Amola Na, Hina Gode, da dili gaga:i dagoi, amo dilia dawa:mu. Amola Isala:ili Gode Bagadedafa da di halegale masa:ne, dia se iasu diasu logo doasi dagoi, amo di da dawa:mu.