Popular Bible Verses from Romanos 14

Share

Xíni̱ ñóꞌó kunda̱a̱ ini yó ndí o̱n si̱ví xa̱ꞌa̱ ña xíxi yó, ni o̱n si̱ví xa̱ꞌa̱ ña xíꞌi yó kúu ña ndáya̱ꞌví chindeé yó ña va̱ꞌa kundiko̱n yó yichi̱ ña xáꞌnda chiño Ndios. Ta ña ndáya̱ꞌví ní ka̱ kúu ña kasa ndivi yó ñanda̱a̱, ta ña kutaku̱ yó xíꞌin ñava̱ꞌa ini yó, ta ña kutaku̱ yó xíꞌin ñasi̱i̱ ña chíkaa̱ Níma̱ Ndios ini yó. Tá xíꞌin ña ndáya̱ꞌví ní yóꞌo táku̱ yó ta kísa chiño yó no̱o̱ Jesucristo, ta saá ndixa sakusii̱ yó ini Ndios, ta sakusii̱ yó ini ni̱vi.

Saá chi tá táku̱ yó, ta táku̱ yó xa̱ꞌa̱ ña chinóo síkón yó ñato̱ꞌó Jesucristo, Ta̱a ta̱Káꞌno no̱o̱ yó. Ta tá kivi̱ yó, ta kivi̱ yó xa̱ꞌa̱ ña chinóo síkón yó ñato̱ꞌó Jesucristo, Ta̱a ta̱Káꞌno no̱o̱ yó. Ta saá tá táku̱ yó án tá kivi̱ yó, ni̱vi na ndíko̱n Jesucristo kúu yó.

Ta saá va̱ꞌa ná chikaa̱ yó ndee̱ ña vivíi kutaku̱ yó xíꞌin natáꞌan yó na kándixa Jesucristo, ta ñii ki̱ꞌva saá chikaa̱ yó ndee̱ ña chindeé táꞌan yó ña va̱ꞌa ka̱ kuaꞌno yó xíꞌin ña kándixa yó Jesucristo.

Ta saá o̱n váꞌa ka̱ꞌa̱n kuáchí yó xa̱ꞌa̱ natáꞌan yó, na kándixa Jesucristo, ta va̱ꞌa ka̱ xíni̱ ñóꞌó chikaa̱ ini yó ña o̱n nda̱ loꞌo chindúꞌu̱ yó ña kakiꞌi xa̱ꞌa̱ nañani yó án xa̱ꞌa̱ náki̱ꞌva̱ yó, ña ko̱yo nayóꞌo kua̱chi. Ta nda̱ loꞌo o̱n keꞌé yó ña chindaꞌá natáꞌan yó ña sandakoo na yichi̱ Jesucristo.

Chi to̱ꞌon Ndios ña ni̱taa na xi̱na̱ꞌá káchí ña saá: “Ndixa yi̱ꞌi̱ kúu i̱ ta̱a ta̱ táku̱”, káchí Ndios, “ta ñii ki̱vi̱ va̱xi ndixa ndiꞌi ni̱vi kuxítí na no̱o̱ i̱, ta ndiꞌi ni̱vi kasa káꞌno na yi̱ꞌi̱, ta̱a ta̱ kúu Ndios”, káchí Ndios, káchí to̱ꞌon ra ni̱taa na xi̱na̱ꞌá. Ta ki̱vi̱ ña kundivi to̱ꞌon yóꞌo, ñii ñii mi̱i yó koni̱ ñóꞌó yó nataxi yó kuenda no̱o̱ Ndios xa̱ꞌa̱ ña ke̱ꞌé mi̱i yó.

Tá yóo ni̱vi na sa̱kán loꞌo va̱xi kuaꞌno ña ndáa ini na Jesucristo, ta xíni̱ ñóꞌó va̱ꞌa nakiꞌin ndó ni̱vi yóꞌo. Vará o̱n vása yóo yuꞌú ndó xíꞌin nayóꞌo xa̱ꞌa̱ ndiꞌi ña káꞌa̱n na, ta o̱n váꞌa kani táꞌan ndó xíꞌin nayóꞌo.

¿Nda̱chun xáni si̱ni̱ ndó ndí kómí ndó nda̱yí ña ka̱ꞌa̱n kuáchí ndó xa̱ꞌa̱ ni̱vi na kísa chiño no̱o̱ ta̱káꞌno no̱o̱ mi̱i na? Chi ndasaá kuiti Jesucristo, ta̱a ta̱ kúu ta̱káꞌno no̱o̱ ni̱vi yóꞌo, ta kúu ra ta̱káꞌno no̱o̱ mi̱i yó, kúu ta̱a ta̱ kómí nda̱yí ka̱ꞌa̱n ra án va̱ꞌa, án o̱n vása va̱ꞌa kéꞌé nayóꞌo. Ta ndixa ndáa ini yó ndí Jesucristo káꞌa̱n ra ñava̱ꞌa xa̱ꞌa̱ mi̱i yó, na kúu ni̱vi na ndinoꞌo ini kísa chiño no̱o̱ ra. Saá chi mi̱i Jesucristo kúu ta̱a ta̱ kómí ndiꞌi ndee̱, ta ndixa chindeé ra mi̱i yó ña va̱ꞌa kundiko̱n yó yichi̱ ra.