Popular Bible Verses from I-Galasia 5

Share

Nem sota toon kaishalan ni Ispirito Santo nen Apo Shiyos, iyay iray ma‐sas son si‐kato: semek, imdeng, talna, anos, pengaasi, mapteng nga nemnem, tan emepiyal pay; amta ton memesinsiya ni eshom, tan amta ton tetngelen shorog i bakdang to. Sajay iren ogadi, emaytotop shi emin na bilin nen Apo Shiyos.

Isonga kowan ko ey itodok joy Ispirito Santo nen Apo Shiyos ja mengiredan son si‐kayo, say eg jo onoren sota pipiyan ni bakdang jon dag‐en ja ngaaw.

Jet sota Ispirito Santo nen Apo Shiyos i engi‐kan ni biyag tayo, isonga mesepol ngon si‐katoy mengiredan son si‐katejo.

Sota toon ẃara son Cristo Jesus, singa inpakilansara shi koros sota ngaaw wa ogadira, pati sota ngaaw ja istay pipiyan sha, jet inbiyang sha ma sotan iren ngaaw.

Sota aramid ja na‐alas ja pipiyan ni bakdang nga dag‐en, edawag, jet si‐kato ira jay: sota pemii ono kompormin ensekig ga aramid, pandeka ni ngaaw ja mengibiyang ni kowan ni eshom, panshedjaw shi sinan shiyos, panmantala, sota igem, babakal, apal, bonget, isew, eg peki‐olnos shi eshom, pengamkam ni kokowa ni eshom, panboteng, edaos ja pandadsak, tan ẃara pay i eshom ma banag ja inges niyay ya ngaaw. Ipinshowak mowan iya inkowan ko nontan son si‐kayo, ey sota sajay i aramid to, eg ira mayda‐kam shi pantoshayan nen Apo Shiyos ali.

A‐akik shi pamati, say kabol la pinidi‐an shakejo so nen Apo Shiyos, say meẃedja‐an kayo, nem sajay ya ẃaya, aliẃen jo koma osalen shi pipiyan jon dag‐en ja ngaaw. No diket say pesing jo et mango, ipa‐sas joy semek jo ni sakey tan sakey son si‐kayo ni joka pantitinolong.

Ta sota ngaaw wa pipiyan ni bakdang nga dag‐en, maykontra shi piyan ni Ispirito Santo. Sota piyan ni Ispirito Santo, eg ngo piyan ni bakdang nga dag‐en. Sajay ya showa, eg man‐inawatan, isonga emedingding sota piyan jon dag‐en ja mapteng.

Ta sota emin na bilin nen Apo Shiyos, sakey bengat i esa‐nopan ton esel, jet si‐kato iyay: “Semek moy kait mon too ja inges toy moka penmek ni bakdang mo.”

Aliẃen kito koma mandastog, ja mengi‐kan ni bongetan ni kait, ono mengi‐kan ni epalan to.

Isonga niman, aliẃen singa baga‐en kito ma ja inpokok ni bilin nonta bayag da, ta inbolos shakito nen Cristo. Jet eg to koston on‐oli kiton manngeshan mowan ni baga‐en. Isonga karejo itolok ja pesakbat shay digat ni bilin nonta bayag da son si‐kayo.