Popular Bible Verses from Roma 8

Share

Anu bhar bwe: Awya ro yhafri Allah tna Allah ysok ait yamo raa wAit oh to, Allah ysaim bo bawya ro kbe mama mo kʼraa retait ye. Bo ro moof ye tna bo ro matu mai kʼait ye. Allah ysaim bo weto kaket re kbe makit rau to moof kʼraa retait.

Reto oh mi jõ thar tawe bo aro matak re mno Allah yitsre anu to fee. Mfi bo anu bhai oo, bhau baam bo to, kbe Ait yitsre anu fee. Malaikat oo, kabes bo to matak fee. Bombra ro mama mai kʼanu mkah ayõ ro ifo tna ayõ ro meen mama wono beta to, kbe mno re Ait yitsre anu fee. Bo ro matak toni mam tabam refo aro kbe mno anu to, Ait yitsre anu fee ye. Bo ro mhau mam uu matak re mno Ait yitsre anu fee. Bo ro mhau mam tite to, matak fee ye. Bo ro Allah yfen beta to aro matak miwer Ait fee ye. Allah yhafri anu yum. Kristus Yesus fi Tuhan ranu. Anu bmat bo ro Kristus yno tibyo bhar bwe Allah yhafri anu toni syok.

Wore arin mkair tibyo bmos wanu ssafo fee to, rau ro moof anu binaut bo ro meen Allah siwyan kʼanu meto. Wore weto to, anu wase skabuk bkyas bo bawya kʼAllah. Menohe Har rAit mhar bonaut wanu oh. Tibyo Har mesait skabuk anu kʼAllah kaket miwrek ja anu raa btai skabuk to.

Allah yno bo ro moof kʼanu mninon. Feto to anu bhar bwe Allah yros tis yban anu meto. Feto to kbe awya yatak yiwer anu?

Feto to mfo refo anu bhai su bsya Kristus Yesus oh. Tibyo Allah kbe yno safo mana ymit kʼanu aro fee.

Tna raa ro makit wana to, ja mnaut bo ro tabam refo sai to, ana weto meen mhai tna mkai kair. Menohe raa ro makit wana to, ja Har ro Tuhan mbo matak to, kbe ana mhaf tnok tna meen mhau hame wajin ye.

Bo bawya ro mai kʼanu to bnaut yyi ma. Bhar bwe Kristus yhafri anu fares. Tna Kristus yatak rAit mno re tis rau to anu bros btak abyõ.

Tna jõ tnaut tawe bo samyoh ro matu mai kʼanu weto to bo maku sai. Menohe bo yase ro Allah rAit to, ro kbe anu fri to, bo msai toni.

Bo bawya kbe mno wa hafri ro Kristus kʼanu to? Kbe Ait yhafri anu yum! Kbe bo mama mai kʼanu taro, menohe Kristus yhafri anu to fares. Mfi bo make anu oo, bo mno yoot anu oo, haisre mama mai kʼanu oo, ratan ro byum marak oo, safo mama mai kʼanu oo, raa mame anya bo to, kbe Kristus tait yhafri anu fares.

Allah ja ymat sas anu bhaf, srau mato wanu to. Tna yhar bo ro Har rAit soh-soh mawe to ye. Feto to anu, raa ro Allah wAit to, Har rAit ja skabuk anu mamyot bo ro Allah yhaf ksoh yno kʼanu ye.

Awya sai ro yari bo ro Har rAit mkyas tna ybo yno to ait oh mi ku ro Allah rAit.

Raa ro tabam refo to, ja ana makit wana mnaut bo ro tabam refo sai. Menohe raa ro Har ro Tuhan mbo to, ja ana makit wana mnaut bo ro Har reto ksoh.

Allah yhaf mabe Ku rAit to fee. Ysan Ait yroh yama yajat mkah yfes anu beta. Feto to anu bhar bwe Ait yatmof anu. Kbe anu bhau to bo mabut fee. Tibyo meen ysan bonaut rouu beta kʼanu ye tu oh.

Anu bhaf wanu mhar mawe anu fo ku ro Allah wAit oh. Tna Har rAit mkyas mnan anya ye mawe kʼanu mawe anu ku ro Allah wAit tu oh. Soh anu bmo ku ro Allah wAit to, kbe anu bhaf bse bo yase rAit ye. Bo yase reto kbe Ait ysan Kristus tna ysan kʼanu ye. Tna bo ro samyoh mai kʼanu ye mnan anya msya bo ro samyoh ro tiwya mai Kristus to ye. Anu bsom bo ro samyoh feto tibyo kbe anu bkai bo yase rAit reto ye.

Tna ana ro ja mnaut bo tabam refo to ana mhoh byoh kʼAllah. Tna ana weto mtai kro Watum rAit fee tibyo ana hawe bo mari Watum rAit ye.

Bombra beta ro Allah yfen mam tabam refo to, mhau sraujin mawe tija fooh Allah yasbrah ku wAit yoo bo yase rAit yse kʼana baro.

Anu bhar bwe bombra beta ro Allah yfen to ste wea. Bo weto mwof ti ro ana mbros mbam bo ro make ana. Tiwya tinyi mamo snok mfo refo to, bombra weto to, sraujin tna mkai bo fares. Reto mfi fnya ja mari kborham wia tna mawe fooh re mabe ku to!