Popular Bible Verses from Wahyu 13

Share

Awya sai ro ja yhar bo to, kbe yhar bofret ro angka reto: Kak reto angka rau to 666. Tna aat reto merif raa sait yasom rait ye.

Yohanes ymat he raa mawat toni kbe mbaut kak ro ja mban kabes reto. Ana weto to raa mkom masom wana mam aam ro Domba Maku rau to fee. Raa mabo baro sai hawe mbaut kak reto. Ana weto to masom wana raa mkom mam aam Domba Maku rau. Aam reto mkyas raa masom ro kbe mhau hame wajin. Allah yfen tabam refo fefares to, bi Ait ynaut Domba Maku refo. Ynaut yawe, “Kbe raa mame Domba majat re kbe mees rau myon iro raa; tibyo ana mkai riof.”

Tna patung reto mbis raa beta moo tanda mnan fi aat tna mame kʼana matem ati, soh mfe makit wana: Raa mabi msya kukek ye, ro mase msya ro kinyah, tna ro bobot msya ro sryan ye. Ana mako hawe sai, raa mikoh raa beta mame aat reto. Menohe raa taro hawe. Tibyo kak ro ewok reto mno wa re ana weto moo boit fee, tna masim boit kʼraa fee ye. Kak reto mbis mawe raa ro mame aat reto mesait aran moo boit tna masim boit. Aat ro raa mame reto to, kak masom rau soh mfe to angka rau reto.

“Allah ysok raa taro. Tna yawe meen raa mfot raa weto tna makah ana mamoʼt tabam rana. Allah yhar bo rAit. Feto to raa weto kbe raa mfot tna makah mamo tabam rana tu oh. Tna awya ro Allah yawe meen raa mame ait mkah pedang to, kbe bo reto mabo tu oh ye.” Yeremia 15:2, 43:11 Meen arin ro mkair mama. Tna wore oon sboh to, kbe raa beta mkai bo. Anu raa ro Allah wAit to, kbe nkai bo ye. Jõ tawe kʼanu tawe bito smot bi Ait kaket! Susu ma!

Tna jõ tmat kak ro ja mban kabes sau frok mbam aya sawan masuf. Kak reto metsu sau, mana rau to trion krema tna tanduk rau to trion nsaa. Tna watau (mahkota) mana mur abyõ mam tanduk rau sau-sau. Tna mam mana sau-sau wau to, raa mkom masom kair ro mamus Allah.

Tna kak ro ja mban kabes reto mafa msya raa ro Allah wAit. Raa moo matak mee tibyo kak reto mros matak tna raa ro Allah wAit matak fee. Allah yasu sayõ rof kak reto. Tna kak reto mros matak mbo raa mbam raa mana aro rau-rau beta: Ana mmai rana to aro rau ha-hayah ye. Raa weto mama mbam rabin rana aro sor-sor ye.

Kak tinyi ro ja mban kabes reto moo tak rau mee kak ro ewok reto afo re ro ewok reto mno bo ro msai. Tibyo raa mari bo ro kak ro ewok reto mkyas. Tna kak reto besruf raa; mbis ana mfen patung sau ro masu mnan fi kak tinyi reto tna mse kʼana mbaut. (Kak ro tinyi reto to, tiwya raa maru mkah pedang tibyo mana mabet maboh menohe majat fee.) Tna raa moo tak mee kak ro ewok reto re au mno patung reto maam. Tibyo patung reto mrok maam tna mmai ye. Raa taro hawe mbaut patung reto. Tibyo patung reto mbis raa wau mawe, “Nmo nme ana weto majat!”

Kak ro jõ tmat reto metsu rau mnan fi pus ro maboh sau masom macan tutul. Tna maa kbis rau to miyõ tna maan mnan fi kak sau ro masom beruang maa. Tna mbait rau to maan mnan fi singa mbait. Tna kabes aban reto msan matak rau kak ro ja mban kabes reto. Mbis kak reto hre mam ambar (tahta) rau tna mbo raa mkah matak rau.

Kak ro ja mban kabes reto safuk mawe au u kar, tna au mamus Allah. Allah yasu sayõ rof kak reto. Tibyo kak reto mros matak mbo raa ro mhau mam tabam refo, mamo snok snyi trion 42.

Kak reto mana wau trion krema. Tna hbis maboh mhau mayir mam mana rau sau. (Tiwya raa maru kak reto tibyo kene wo majat, he mfe. Tibyo hbis maboh reto mhau mayir sai fares.) Raa beta mmat kak ro ja mban kabes reto tna ana mrok ktak tibyo mari bo ro kak reto mawe.

Tna jõ tmat kak roto sau frok mbam tabam te mato maut. Kak reto tanduk rau to trion ewok mnan fi domba maku. Kak reto mkyas bo to, mmai rau mnan fi naga mmai. Kak ro ewok reto mros tis mban kak tinyi ro ja mros tis kabes reto. Kak ro tinyi reto msan matak rau kak ro ewok. Mno re raa msya bombra ro tabam refo mbaut kak ro tinyi reto.