Popular Bible Verses from ISAÍAS 53

Share

Paytaq ichaqa mana kasukusqanchiskunamanta k'irisqa karqan, huchanchiskunamanta sinchi muchuchisqa karqan. Diosqa allinninchispaqmi paytaqa ñak'arichirqan, chaymi k'irisqa kasqanwan qhaliyachisqa kanchis.

Llapallanchismi ovejakuna hina ch'eqeripurqanchis, sapankan ñanninmankama t'aqarikapurqan, Señor Diostaqmi llapanchispa huchanchismanta payta muchuchirqan.

Chaypas paypunin onqoyninchiskunawan muchurqan, nanayninchiskunatapas muchurqanpunin. Ñoqanchistaq Diospa ñak'arichisqanpaq yuyarqanchis: Diosmi paytaqa k'irishan k'umuykachishan, nispa.

runakunaq pisichasqanmi qhawarparisqanmi karqan. Nanaypa ñit'isqan runan karqan, muchuyman yachasqan karqan, manan pipas paytaqa rikuyta munarqanchu, ñoqanchispas pisichaspan hinallata qhawarparirqanchis.

Payqa muchuchisqan karqan, ichaqa k'umuykukullarqanmi, manan rimarillarqanpaschu. Nak'anapaq apasqa borrego hinan karqan, millman rutuqninpa qayllanpi oveja hinan upallakurqan, manan payqa rimarillarqanpaschu.

Ichaqa Señor Diosmi nin: Paytan muchuchiyta munarqani, hinan payqa hucha pampachaypaq sacrificasqa wañurqan. Chaymi mirayninta rikunqa, unaytataq kawsanqa, ñoqa Señor Diospa yuyaykusqaykunatapas paymi hunt'anqa.

Ch'ikchisqa hinan payqa Diospa ñawpaqenpi wiñarqan, ch'aki hallp'api saphiyoq hinan wiñarqan. Manan allin rikch'ayniyoqpaschu munaypaschu karqan. manan qhawapayaspa munanapaq hinapaschu karqan

Ñoqaqa allichachaqkuna ukhupin payta hatunchasaq, kallpasapakunawantaq qechusqakunata rakinakunqa. Wañunamanmi paymantakama rirqan, huchasapakuna hinan wañurqan, pay kikinmi askha runaq huchanta q'epirqan, huchasapakunapaqmi ñoqamanta mañakurqan.

Sinchi muchusqan qhepatan k'anchayta rikunqa, chay hinapin yachanqa mana yanqapaqchu muchusqanta. Chanin kamachiymi askha runaq huchanmanta muchurqan, chaymi payqa paykunata chaninchanqa.

Mana chaninninpin hap'isqapas juzgasqapas karqan, manataqmi pipas paymanta llakikurqanchu. Wañuchipurqankun, llaqtaypa huchankunamantan wañuchisqa karqan.

Huchasapakunawanmi p'ampasqa karqan, qhapaqkunawanmi p'ampasqa karqan, chaypas manan hayk'aqpas mana chaninta ruwarqanchu, manan llullakurqanpaschu, nispa.