Ao mani nitingaala, niimbona omuyaka kw'amaani nikuwuucha nikutulira emukulu. Mani olumesu nilumyesuha nilutula mu sireesi sisyebodohaanie, esyalimo omuliro kwaaduuha ataali ohusima daawe. Mani akatikaati w'omuliro okwo mwalimo esiindu esifwaana koti omugasa kumesamesa. Akatikaati w'omuliro okwo, ndabonamo ebiindu ebifwaanana koti ebiloonge bilamu bine. Byali nibifwaana koti abaandu, nae buli situlayo nisiri neende obweeni bune neende embaya chine. Amakulu kabyo kali amakololofu, haandi ebisiisiro byaabyo byali koti ebirekeyi by'esurusi; haandi nibimesa-mesa koti omugasa kuruudirwe. Mani aasi w'embaya chaabyo, hu nyaande chine mwalimo amahono kali koti ak'abaandu. Abakerubbi bane abo bali neende obweeni neende embaya chiri chiti: embaya cha buli otulayo chaambaanisibwa hu mbaya ch'omukerubbi waasye. Mani ebiloonge ebyo byachichaanga mu muno nibiri tiiri, nisibulao esikaluuhana kata nabudiidi.
