Popular Bible Verses from looma 12

Share

'ote noa uv'oha ta hpʉhpʉngʉ, la poa teovahneni to hamo na muu, teofafaevai na 'tohʉngʉ ho koyumu, teeno peelʉi husansana zou cuma na 'tohʉngʉsi, cohivi zou cuma na mou'ʉmnʉ, a'sʉftonʉ ho peelʉi ʉm'ʉmnʉa.

ko'koeno, maanat'ohaesa, ho isieno yaica ci hia acocoveoza to hamo a'to, te'o cucufni muu ho mais'a yaansou ci sʉ'ta ho sʉ'teni to hamo, conci 'tohʉngʉ ho fifiho to hamo, noa ʉm'ʉmnʉa to hamo. 'aeno eni nantemu a'ʉmta sʉ'teni cimo mou'ʉmtʉ ci m'ohkuyu.

yono taico no ta'usni ho kokaekaebʉ, notaico no 'atutumzo la luaveica, la asno'zonʉ hola 'inoli.

ko'koeno, teav'a poa atpʉtʉneni no kuzo, la boemi no ʉmnʉ ho atpʉtʉ no kuzo.

la nananghinghia 'emo cono feango; la aʉ'ʉmtʉ yupa einu.

himngonghi no cou la mou'ʉmtʉ. la himkuzo to kokuzo, noʉyʉci na mou'ʉmnʉ.

la pnanfi na tonʉsu ho bunananghiya to botngonʉ.

maananghia, teav'a eveineni si iachi, la poahe eveineni to hamo na lako ngoveoa, maica isi yainca to seiso: <yainca to nooe'oca: tomakneni a'o; te'o ahtao'te auskeni.>

'otela lue'amamza, la asno'zonʉ yaahioa, boemi no cuveu ci 'tohʉngʉ ho fifiho to nooe'oca.

ieni to isi faeni a'o to hamo ci mengumi, te'o mi'usnu ta mimu macicihi ho yainca: teav'a anga huepzi si iachimu, la apuyu einu ho noyʉyʉci 'e iachi, macicihi maino isi faeni to hamo ci singkoo ho tosvʉti 'e iachi.

'otela boemi no kuzo ho auski no kuzo; nala toehunga huyoyonghua ci hi'hioa, la soekaebeni ho hioa.

'upena hoci mi'usnu nomo mainenu ci cou, la cono 'tohʉngʉ ho yupa maecingi. 'otela bobitano na 'tohʉngʉ, la euteozuc'o tola huaceaci; maezo 'otela ma'unano mo iachi mau'to'tohʉngʉ.

ivaha yainca to seiso: <hoci sieyo na hangʉsu, la poa bonʉa, hoci mecu, la poa mimoa; hociko yaica, tena ma'kokoe'i na 'tohʉngʉsi.>

tooyokeoi 'ola akuzkuzo suu ci cou; 'aenozou, la tooyokeoi, teav'a patkuzkuzoi. la i'upu kaebʉ tola kokaekaebʉ ci cou, i'upu mongsi tola mongsi ci cou.

poa tma'upu no acʉcʉhʉsu 'ola thi'cia ci nat'ohaesa; aʉt'ʉcʉ tola i'mocvihi ci cou.

'emo conci feango mo i'mi no man'i ci maesoesou ho yu'tʉ'cʉnghʉ, 'emo macoconi ci maesoesou mo yaa mav'ov'o ci isi peelʉi hioa. totiski, mito e'vono botngonʉ ci cou, mito no'ayumonʉ to kilisto ho cono feango, macoconi yupa yuecnguhu, hocu mav'ov'o ci maesoesou ta feango.