Popular Bible Verses from Roma 8

Share

Bara nuapa-nuapa majadi, nisanita Alatala nompasiayuna ala manggeni belo ka kita topompotove Ia, haitumo kita anu nipokioNa majadi todeaNa nangoseaka niaNa mboto.

Apa niparasayaku, nau sangaya ledo ria nompakule mompopogaa kita lako ri toveNa. Nau mamate nau matuvu, Ia bate-batena mompotove kita. Ledo ria malaeka atau seta atau kuasa ntanina, ledo ria nuapa-nuapa najadi sii-sii atau nuapa-nuapa majadi bara maipia, ledo ria kuasa-kuasa ri laerava atau kuasa-kuasa ri tana, atau nuapa-nuapa ntanina anu nipajadi nu Alatala, nau sangaya ledo ria nompakule mompopogaa kita lako ri tove nu Alatala. ToveNa haitu nipopakitaNa ante anu nipovia nTuputa i Yesus Kristus ka kita.

Nosa Gasa nu Alatala muni nantulungi kita riara kalenteta. Ledo nisanita mpuu nuapa masipato raulita ri posambayata. Tapi Nosa Gasa mboto nomperapi lako nte Alatala ka kita ante pekakai anu neliu lako ri pompakule basa manusia.

Jadi sampesuvu-sampesuvu. Ane rapekirita pura-pura anu nipovia nu Alatala ka kita, maroso rarata. Apa ane Alatala mosabingga ka kita, isema mompakule mangeva kita?

Jadi sii-sii domo ria pehuku rapambela ka tona nosangu rara ante i Yesus Kristus.

Ane pekirira nikuasai dota rara nadaa, ira mamate bo rapopogaa lako nte Alatala. Tapi ane pekirira nikuasai nu Nosa Gasa nu Alatala, ira matuvu mabelo bo mosinggabelo ante Alatala.

Tapi nau bara nuapa-nuapa majadi nte kita, kita mpuu-mpuu padagi ante petulungi i Kristus anu nompotove kita!

Niparasayaku kasusa bo kapari nirasaita sii-sii damo njongona ane rapoposisala ante kabelo rarasaita bara maipia.

Jadi, nuapa mamala mompopogaa kita lako ri tove i Kristus? Natantu ledo ria! Nau kita masusa atau mapari atau rapandasa ntona, nau kita maara mpai atau ledo ntoto ria pakea, nau kita rakava nu susa bara rapatesi, i Kristus bate-batena mompotove kita.

Bo nisani nu Alatala isi rara ntai manusia, bo nisaniNa patuju nu Nosa Gasa haitu, sabana Nosa Gasa nosambaya ka todea nu Alatala, nangoseaka dota nu Alatala mboto.

Isema-sema nikeniaka Nosa Gasa nu Alatala, iramo ana-ana nu Alatala.

Isema-sema natuvu nangoseaka dota rarana nadaa aga nompekirika anu nipodota rarana nadaa haitu. Tapi isema-sema natuvu nangoseaka dota Nosa Gasa nu Alatala, aga dota nu Nosa Gasa nipekirikara.

Ledo natove raraNa nte AnaNa mboto, nidekeiNa rapatesi mantolo dosata. Sabana haitu, nisanita kana radekeiNa muni ka kita mpengaya-ngaya anu niparaluuta ante joi raraNa.

Nosa Gasa nosanggani-nggani nte rarata mboto nanguli ka kita, kitamo ana-ana nu Alatala. Bo ane kita mpuu-mpuu ana-ana nu Alatala, natantumo kita mantarima belo nipakasadia nu Alatala ka ana-anaNa. Kita muni mantarima pura-pura anu nipakasadia nu Alatala ka i Kristus, sabana ane kita nombarasai kasusa bo kapari mpo anu nirasaiNa, kita muni rapakaoge nasimbayu mpo Ia.

Ane pekiri ntona nikuasai nu dota rara nadaa, ira nangeva Alatala. Ledo nioseakara parentaNa sabana ledo nipakulera.

Sii-sii pura-pura isi nu dunia ante lentora rarara nantongoraka tempona Alatala mompopakita kaoge nu ana-anaNa.

Apa nisanita pura-pura isi nu dunia nandasa sampe sii-sii nantongoraka tempona Alatala mompakabelo puramo. Kandasana nasimbayu mpo kandasa mombine tempo noana.