Popular Bible Verses from Roma 6

Share

Isema-sema novia dosa manggava tambo, bo tambo haitu kamatea anu mompopogaa ia lako nte Alatala. Tapi pedekei bayangi lako nte Alatala ka kita, haitumo kita matuvu mabelo sampe ri kasae-saena. Kita nanggava pedekei bayangi sabana kita nosangu rara ante Tuputa i Yesus Kristus.

Nee radekei karomiu rakuasai nu dosa, apa kita domo nipou Atura agama. Tapi kita nanjarumaka pepotove nu Alatala.

Jadi tempo kita nidiu, mamala raulita kitamo anu namate bo nitana nosanggani-nggani ante i Kristus. Haitu najadi ala kita matuvu ante pokainggu nabaru, nasimbayu mpo i Kristus nipakatuvu mpanjili lako ri kamateNa ante kuasa nTuamata Alatala anu naoge.

Bo nee rapalamba karomiu movia nadaa. Tapi dekeimo katuvumiu ka Alatala apa kita nikabasakamo lako ri kamatea bo nitarimatamo katuvu nabaru. Dekeimo katuvumiu ka Alatala ala karomiu rapake movia anu nanoa.

Nisanita katuvuta nokolu nireke namate nosanggani-nggani ante i Kristus ri kayu salib, ala kuasa nu dosa riara nggatuvuta rapakaropu, bo kita domo rakuasai nu dosa.

Ivesia muni kita, kita kana rareketa namatemo nosanggani-nggani nte i Kristus bo nikabasakamo lako ri kuasa nu dosa. Jadi sii-sii kita kana matuvu bo mompakadamba rara nu Alatala, sabana kita nosangu rara ante i Yesus Kristus.

Nau dosa manusia nantambai kadeana, naogepa pepotove nu Alatala. Jadi, berimbamo? Mabelo ane kita batena movia dosa ala mantambai pepotove nu Alatala ka kita? Tantu ledo! Ledo masipato kita bate-batena movia dosa, sabana namala raulita kita namate nosanggani ante i Kristus ala kita domo rakuasai nu dosa.

Nisanimiu mboto ane kita matundu nte tona bo mangoseaka parentana, kita majadi batuana. Ivesia muni ante dosa. Ane kita batena mangoseaka dota rarata anu nadaa, kita majadi batua nu dosa bo kaupuna kita mamate bo rapopogaa lako nte Alatala. Tapi ane kita matundu nte Alatala, kita majadi batuaNa bo kita rapakanoa ri panggitaNa.

Bara ipia, dopame niparasayamiu i Yesus, komiu najadi batua nu dosa. Tapi nosukuru mpuu nte Alatala! Sii-sii komiu mpuu-mpuu nangoseaka pepatuduki nakana anu nipatolele ka komiu. Komiu nikabasakamo lako ri kuasa nu dosa bo sii-sii komiu najadi batua nu Alatala anu nangoseaka dotaNa.