Popular Bible Verses from - पैली कुरिन्थियों 13

Share

प्रेम धीरज धरत आय, दया करबेवारो आय; प्रेम बैर की गांठ नईं बाधें रैत; प्रेम अपनी बड़वाई नईं करत, और घमण्ड में नईं बनो रैत। बो बुरई चाल नईं चलत, बो अपने भले की नईं सोचत, खिसयात नईंयां, बुरओ नईं मानत।

बो सबरी बातें सह लेत आय, सबरी बातन कौ बिसवास करत आय, सबरी बातन में आसा राखत आय, सबरी बातन में धीरज धरत आय।

बुरए काम से खुस नईं होत, परन्त संचाई से खुस होत आय।

पर अब बिसवास, आसा, प्रेम जे तीनईं पक्के से बने रैत आंय, परन्त इन में प्रेम सब से बढ़ के आय।

प्रेम कभऊं टलत नईंयां; अगमबानी होबें तो मिट जै हैं; भाषाएं बोली होबें तो जात रै हैं; ज्ञान होबे, तो मिट जै है।

जदि मैं मान्सन और सरगदूतन की बोलियां बोलों, और प्रेम न धरों, तो मैं ठनठानात भओ पीतल, और झनझानात भई झांझ आंव।

और जदि मैं अगमवानी कर सकों, और सब भेदों और ज्ञान को समजों, और मोय इते लौ पक्को बिसवास होबे, कि मैं पहारवन हां हटा देओं, परन्त प्रेम न धरों, तो मैं कछु लौ नईंयां।

और जदि मैं अपनी सबरी जादाद गरीब गुरवन को खबा देओं, या अपनी देयां बारवे के लाने दे देओं, और प्रेम न धरों, तो मोहां कछु भी फायदा नईंयां।

जब मैं हलको बच्चा हतो, तो मैं हलके बच्चा घांई बोलत हतो, बच्चन के जैसो हिया हतो, बच्चन के जैसी समज हती; परन्त जब सियानो हो गओ, तो बच्चन की बातें छोड़ दईं।