Popular Bible Verses from Yaagorpc 1

Yie nyei gorx-youz aac, meih mbuo buangh zuqc nyungc-nyungc kouv naanc oix zuqc funx benx njien-youh nyei sic, weic zuqc meih mbuo hiuv duqv buangh naaiv deix sic se seix mangc meih mbuo nyei sienx fim, weic bun meih mbuo maaih noic diev duqv.

Se gorngv meih mbuo haaix dauh cong-mengh maiv gaux, oix zuqc tov Tin-Hungh, Tin-Hungh ziouc ceix bun aqv. Weic zuqc Tin-Hungh nyei hnyouv jangv haic, oix bun zuangx mienh yaac maiv hemx.

Yie hnamv haic nyei gorx-youz aac, naaiv meih mbuo oix zuqc hiuv. Dauh dauh oix zuqc siepv-siepv nyei muangx, mv baac maiv dungx zoux nzuih siepv, yaac maiv dungx qiex jiez siepv.

Oix zuqc longc noic diev taux daauh weic bun meih mbuo haih benx dunh yunh nzoih nyei mienh, maiv caa yietc nyungc.

Maiv dungx nduov ganh laaic haiz liuz doz ziouc gaux aqv. Daaux nzuonx oix zuqc ei jienv zoux.

Haaix dauh zuqc seix yaac diev duqv taux daauh, wuov dauh maaih orn-lorqc aqv, weic zuqc diev liuz, ziouc duqv Tin-Hungh ceix bun nyei maengc. Se dongh Tin-Hungh laengz bun hnamv ninh wuov deix mienh duqv nyei maengc.

Yietc zungv longx nyei, dunh yunh nyei zingh nyeic yiem tin-dorngh njiec daaih. Se Tin-Hungh, dongh zeix cuotv lungh nyei nyungc-nyungc njang wuov dauh, ceix bun mbuo. Ninh yietc liuz maiv goiv yienc, yaac maiv guinh dongz torngv zuqc hmuangx.

Haaix dauh haiz liuz doz yaac maiv ei jienv zoux, se hnangv dauh mienh longc gingx mangc ninh ganh nyei hmien. Mangc liuz, ziouc mingh mi'aqv. Yaac liemh zeih la'kuqv nzengc ninh ganh nyei hmien-mueic hnangv haaix nor.

Ei Zaangc Diex Tin-Hungh mangc, mbuo sienx duqv horpc, zoux cing-nzengc se hnangv naaiv. Buatc guh hanh dorn caux auv-guaav ndortv naanc, oix zuqc goux. Yaac oix zuqc goux jienv ganh, maiv bun baamh gen nyei haaix nyungc jauv guoqv mbuo laih hlopv.

Haaix dauh buangh zuqc nduov ninh baamz zuiz nyei sic maiv dungx gorngv, “Tin-Hungh nduov yie baamz zuiz,” weic zuqc hiuang orqv nyei sic maiv haih nduov maiv zuqc Tin-Hungh. Tin-Hungh yaac maiv nduov haaix dauh baamz zuiz. Mv baac mienh zuqc nduov se laaix ganh nyei hnyouv hanc ziouc yuoqc ganh mingh baamz zuiz.

Jomc wuov dauh gorx-youz duqv Tin-Hungh taaih ninh faaux hlang ziouc oix zuqc a'hneiv.