Popular Bible Verses from I^saa^yaa 60

Share

“Jiez daaih, ziux jienv njang, weic zuqc meih nyei njang taux aqv. ZIOUV nyei njang-laangc cuotv daaih ziux jienv meih.

Maanc guoqv mienh oix daaih lorz meih nyei njang, hungh diex oix daaih lorz meih lungh ndorm nziouv nyei njang.

Mangc maah! Hmuangx oix gomv buangv lungh ndiev, mapv maengh nyei hmuangx gomv maanc fingx. Mv baac ZIOUV oix ziux jienv meih, mienh ziouc buatc ninh nyei njang-laangc yiem meih gu'nguaaic.

Gauh zoqc jiex nyei mienh oix benx yietc fingx, gauh faix jiex nyei fingx oix benx yietc domh guoqv mienh. Yie se ZIOUV. Taux ziangh hoc yie oix siepv-siepv nyei zoux naaiv deix sic.”

Mba'hnoi maiv aengx zoux meih lungh hnoi zanc nyei njang, hlaax-nyutc maiv aengx ziux meih, weic zuqc ZIOUV oix zoux meih nyei yietc liuz nyei njang, meih nyei Tin-Hungh oix benx meih nyei njang-laangc.

Meih nyei mba'hnoi maiv muotv, meih nyei hlaax maiv aengx faix, weic zuqc ZIOUV zungv oix zoux meih nyei yietc liuz nyei njang, meih zuqc nzauh nyiemv nyei hnoi-nyieqc yaac jiex mi'aqv.

Wuov zanc meih mangc buatc ziouc a'hneiv haic, njien-youh gau, mba'nziu mbokc mbokc nyei, weic zuqc koiv bungx-zuoqc nyei huox huin daaih lorz meih, maanc guoqv nyei zinh zoih yaac oix daaih guei meih.

“Cau meih nyei hmien mangc biei bung, buatc meih nyei baeqc fingx yietc zungv gapv zunv daaih meih naaiv. Meih nyei dorn mbuo yiem go nyei dorngx nzuonx, meih nyei sieqv yaac hnangv fu'jueiv nor, duqv hlorpv jienv daaih.

Meih nyei yietc zungv baeqc fingx ziouc benx kuv mienh. Ninh mbuo duqv nzipc deic-bung benx ninh mbuo yietc liuz nyei buonc. Ninh mbuo se yie zuangx nyei cunx, benx yie nyei buoz zoux nyei gong weic biux mengh yie nyei njang-laangc.

Yiem naaiv mingh yiem meih nyei deic-bung maiv haiz ciouv nyei, doqc nyei sic. Yiem meih nyei gapv-jaaix gu'nyuoz yaac maiv haiz baaic waaic baaic huaang nyei jauv. Meih ziouc bun meih nyei zingh laatc maaih mbuox heuc “Njoux En,” yaac bun meih nyei zingh gaengh maaih mbuox heuc “Ceng.”

Meih nyei zingh gaengh oix zanc-zanc koi nqoi, ziangh hnoi ziangh muonz maiv guon, weic bun mienh dorh maanc guoqv nyei zinh zoih daaih bun meih, liemh ninh mbuo nyei hungh diex yaac yienz jienv daaih.

Lorh torh guanh, liemh Mi^ndien caux E^faa daaih nyei lorh torh lunx, oix buangv meih nyei deic-bung. Yiem Qe^mbaa nyei zuangx mienh oix daaih, yaac dorh jiem caux faan^gen^sen daaih zunh gorngv ceng ZIOUV nyei waac.’

“Ganh fingx mienh oix ceix meih nyei zingh laatc. Ninh mbuo nyei hungh diex oix fu-sux meih. Weic zuqc yie qiex jiez meih ziouc mborqv meih, mv baac ih zanc yie korv-lienh meih, ceix en bun meih.

“Maiv gunv meih zuqc guangc zuqc nzorng, maiv maaih mienh jiex jauv. Yie oix bun meih zoux hlo, puix duqv ceng, doic jiex doic benx njien-youh nyei dorngx.

Maanc guoqv maanc hungh oix goux jienv meih, hnangv maa goux ninh nyei fu'jueiv nor. Meih ziouc hiuv duqv yie, ZIOUV, dongh meih nyei Njoux Ziouv, Zuoqc Meih Wuov Dauh se, Yaakopv nyei Henv Haic nyei Tin-Hungh.