Popular Bible Verses from Cuotv I^yipv 32

Share

Baeqc fingx buatc Mose yiem wuov mbong lauh haic, maiv njiec, ninh mbuo ziouc gapv zunv gorngv mbuox Aalon, “Daaih maah! Zeix dauh zienh nyei fangx yienz yie mbuo nyei jauv maah! Dorh yie mbuo cuotv I^yipv Deic-Bung wuov dauh Mose ong, yie mbuo maiv hiuv duqv jiex haaix mi'aqv.”

ZIOUV gorngv mbuox Mose, “Gaanv siepv nyei njiec aqv. Meih nyei baeqc fingx, dongh meih yiem I^yipv Deic-Bung dorh cuotv wuov deix mienh, baamz zuiz ngaengc yie. Ninh mbuo faanv hnyouv ndongc naaic siepv, guangc yie hatc ninh mbuo yangh nyei jauv. Ninh mbuo longc jiem dox dauh ngongh gouv daaih gueic njiec baaix. Ih zanc ninh mbuo zungv dorh saeng-kuv mingh ziec aav loh! Ninh mbuo yaac gorngv, ‘O I^saa^laa^en Mienh aah! Naaiv se meih mbuo nyei zienh, dongh dorh meih mbuo cuotv I^yipv Deic-Bung wuov dauh.’+”

Aalon buatc hnangv naaiv nor ninh ziouc ceix norm ziec-dorngh yiem jiem-ngongh dorn nyei nza'hmien maengx yaac gorngv, “Njang hnoi mbuo jiex norm zipv houc ZIOUV. ” Da'nyeic ndorm baeqc fingx jiez sin nziouv nyei, dorh saeng-kuv daaih buov ziec yaac fongc horc ziec weic jiu tong. Ziec liuz, ninh mbuo zueiz jienv nyanc, zueiz jienv hopv, jiez sin daaih yiem wuov saanx.

Da'nyeic hnoi Mose gorngv mbuox zuangx baeqc fingx, “Meih mbuo za'gengh baamz zuiz hlo haic, mv baac ih zanc yie oix faaux mbong mingh ZIOUV wuov. Nziex haih tov ninh guangc meih mbuo nyei zuiz.”