Popular Bible Verses from El Apocalipsis 22

Share

Huēj huin tsínj gu̱ꞌnaj Alfa nga̱ Omega. Daj si Alfa huin letra gaxi̱ꞌi asi̱j sini ya̱n. Ni̱ Omega huin letra nicoꞌ da ru̱cu. Ni̱ huēj huin tsínj niquinꞌ asi̱j sini ya̱n. Ni̱ huēj huin tsínj gui̱niquinꞌ ni̱ganj anj.

Hué dan ni̱ gataj Jesucristo: ―Ráꞌyanj gui̱sī rian ma̱n án re̱ꞌ. Ni̱ nicā si na̱ruꞌuē rian án re̱ꞌ. Ngaa ni̱ na̱ruꞌuē rian da go̱ꞌngo a ni é re̱ꞌ da̱j rúnꞌ guiꞌyaj go̱ꞌngo a ni é re̱ꞌ.

Hué dan ni̱ ataj Espíritu Santo nga̱ yunꞌunj xa̱na ga̱huin nica̱ Jesucristo: ―Ga̱huaꞌ re̱ꞌ aj. ―Gataj nu̱ngüej-éꞌ. Ni̱ tsínj unun nuguanꞌ nan, ni̱ ga̱taj síꞌ: ―Ga̱huaꞌ re̱ꞌ aj. ―Ga̱taj síꞌ. Tsínj nagoꞌo nnee, ni̱ ga̱ꞌnaꞌ sij. Ni̱ sisi̱ huin ruhua sij, ni̱ go̱ꞌo yu̱n sij nnee ꞌyaj si ga̱ne ni̱ganj sij nga̱ Yanꞌanj.

’Ni̱ hua ꞌueé rian ni ngüi̱ naruꞌui si-ganꞌ sisi̱ ga̱ꞌue xa̱ ni sij chruj ayu chra̱ chrun ꞌyaj si ga̱ne ni̱ganj ni sij nga̱ Yanꞌanj. Ni̱ ga̱ꞌue ga̱tu ni sij rian hueꞌ duꞌua xumanꞌ daj.

Hue dan ni̱: ―Ráꞌyanj gui̱sī rian ma̱n án re̱ꞌ. ―Daj gataj Jesucristo gunun néꞌ. Ni̱ hua ꞌueé rian tsínj unun sa̱ꞌ ni nuguanꞌ nun rian yanj libro nan huin nuguanꞌ ataj snanꞌanj da̱j ga̱huin nga̱ ni ngüi̱.

Ni̱ si̱ guini̱ xumanꞌ daj. Ni̱ nitaj si ruhuaj sisi̱ gui̱xiguin yanꞌa̱n xumanꞌ daj. Ni̱ nitaj si ruhuaj sisi̱ gui̱xiguin, gui̱ꞌyaj güi. Daj si gui̱xiguin rian ni sij, gui̱ꞌyaj Yanꞌanj huin Señor. Ni̱ ni̱ganj ni̱nꞌ gui̱nicaj sun ni sij nga̱ Yanꞌanj.

Hué dan ni̱ gataj Jesucristo huin tsínj aꞌmi ni nuguanꞌ nan: ―Xa̱ngaꞌ ni̱ ráꞌyanj gui̱sī rian ma̱n án re̱ꞌ. ―Daj gataj Jesús. Ni̱: ―Amén. Ga̱huaꞌ re̱ꞌ Señor Jesús, ―ataj néꞌ. Hué dan ni̱ huin ruhuāj sisi̱ Señor Jesús gui̱ꞌyaj sinduj rian án re̱ꞌ. Amén.

Ni̱ ataj chrūnj rian daranꞌ ni tsínj unun ni nuguanꞌ nu̱n rian yanj libro nan huin si-nu̱guanꞌ Yanꞌanj sisi̱ si̱ gutaꞌ ni sij chra̱ ni nuguanꞌ nan mánj. Daj si sisi̱ hué daj gui̱ꞌyaj ni sij, ngaa ni̱ ga̱ꞌnij Yanꞌanj sayun ga̱ꞌnaꞌ rian ni sij da̱j rúnꞌ hua ni̱ca rian libro nan. Ni̱ sisi̱ hua ꞌngo̱ tsínj gaꞌnej ni nuguanꞌ nun rian yanj libro nan huin nuguanꞌ ataj da̱j ga̱huin ni güi ga̱ꞌnaꞌ, ngaa ni̱ ga̱ꞌne Yanꞌanj si-xugüi sij rian yanj libro ta̱j si-xugüi ni ngüi̱ ga̱ne ni̱ganj nga̱ Yanꞌanj. Ni̱ si̱ gaꞌue ga̱tu sij chruhua xumanꞌ hua sa̱ꞌ daj da̱j rúnꞌ hua ni̱ca rian libro nan mánj.