Popular Bible Verses from Aizaia 60

Share

Jɛrusalɛm, yiɣisima n-chɛ ka a neesim neei; dama a neesim kana. Yawɛ jilima neeg’ a sani.

Zuliya pam niriba ni ka yi neesim maa ni na, ka nanim’ ka yi biɛkaali neesim ni na.

Nyama, zibisim ni ti be dunia ni, ka niriba be bumbɔn’ ni. Amaa Yawɛ ni chɛ ka o neesim neei gili ya, ka chɛ ka o jilima siɣi yi zuɣu na.

Bɛ ni ŋun pɔra ni ŋun nyɛ tarima daŋ ni yɛligi n-leei zuliya shɛb’ bɛn mali yaa. Di saha yi ti paai, n ni chɛ ka di niŋ lala yomyom. Mani n-nyɛ Yawɛ!

Wuntaŋ’ ku lan nyɛ yi neesim wuntaŋ’ ni. Ka goli gba ku lan nyɛ yi neesim yuŋ. Man’ Yawɛ n-yɛn nyɛ yi neesim sahakam, ka mani ŋun nyɛ yi Naawuni ŋɔ jilima neesim ni nɛn ya.

Yi wuntaŋ’ mini yi goli ku lan lu, dama Yawɛ n-yɛn nyɛ yi neesim sahakam; ka yi fabila dabisa la zani tariga.

Yi ni ti nya dimbɔŋɔ, ka di niŋ ya suhupiɛlli. Bɛ ni ti ʒi teeku ni azichi na ti tin ya, ka ʒi zuliya shɛb’ gba daazichi na ti tin ya.

Lihimiya nya din niŋdi gili ya; sokam zaa laɣimmi ka yi sanna. Yi bidibisi ni yi katiŋ’ na, ka bɛ kpuɣi yi bipuɣinsi buɣ’ na nti tin ya.

Di saha ka a niriba zaa ti leei bɛn tumdi din tuhi, ka su tiŋgbani maa sahakam. Mani n-nam ba, ka zaŋ ba ʒili nimaani ni di chɛ ka n nya jilima.

So ku lan wum girigiri yɛla yi tiŋgban’ ni. Ka so mi ku lan saɣim yi tiŋgbani ŋɔ yaha. N ni be kaman gooni la n-taɣi ya ka chɛ zaɣ’ biɛɣu; ka yi paɣi ma n ni tiligi ya zuɣu.

Yi tiŋ’ dunoli ti ku yo n-kpari yuŋ ni wuntaŋ’ ni zaa, dama tinzun’ nanim’ ni gari tooni n-zaŋ bɛ niriba ka bɛ ʒi bɛ daazichi na ti tin ya.

Bɛ ni ʒi Midian mini Ɛfa laakum’ pola na ti niŋ yi tiŋgbani ŋɔ ni. Ka Shiibanim’ zaa ʒi salima mini tulaale zim na; ka leei bɛn paɣiri Yawɛ.

Tinzunnim’ ni kana ti me yi goma tin ya, ka bɛ nanim’ jɛm ya. N daa yiɣisila n suhu bahi yi zuɣu n-darigi yi tibili, amaa pumpɔŋɔ n ni zɔn ya nambɔɣu, ka niŋ ya nirilim.

Hal bɛ ni daa je a ka zaɣis’ a, ka so bi kpɛr’ a ni la zaa yoli, n ni chɛ ka a galisi ka mali jilima, ka lan chɛ ka a nyɛ luɣ’ shɛli suhupiɛlli ni yɛn be sahakam.

Zuliya kam mini nanim’ ni gbib’ a kaman paɣ’ ni gbib’ o bia ŋun mɔɣiri shɛm la. Ka a baŋ ni man’ Yawɛ n-nyɛ ŋun tilig’ a. Ka lan baŋ ni Izraɛl Naawuni ŋun nyɛ kpiɔŋzaalan’ ŋɔ n-fa a bahi maa.