Popular Bible Verses from Deutéronome 8

Share

Ama ní téetí ti-Dindaan ni-Nimbɔtiu pu. Di sá yii úǹ di tīī-ni mpɔn ní ni ŋúń ki túń ditundi ki ká tigaajati gbanti kɔkɔ. U ŋá míǹ kí dàkà yii u nín nìn pōoǹ ni-naanjab dipoondi diŋyee, u bíi ŋáań míǹ kii an nín bíi jītí pu díǹ nan ní.

Agìń gbanti boonee, u yāntì ŋkùm cúú-ni, ní ki dū maana un nimbi nì ni-naanjab kaa nìn nyée ki kpíiǹ-ni. U nìn ŋá míǹ kí dàkà-ni yii an kaa sá tijin dijil ŋmaniŋma di yì unil maŋfal, ama anyɔɔbun ŋin kɔkɔ nyēeń ti-Dindaan nyɔkɔnee di yì unil maŋfal.

Ní téetí ti-Dindaan ni-Nimbɔtiu nín yāntì ni cōom̀ disaŋkindi din kuteeun abin imuŋku ilee pu. U nìn yāntì ni ká agìŋ́kpaan kí cɔ̄ŋkì-ni. U nìn ŋá míǹ kí kpèè yii, ni-pɔbiliŋ poonee, ni làá nīn tɔ́ u-marabaaa, naa làá nīn tɔ́-bi.

Naa máaǹ kí lì yii: «An sá nì ti-pɔŋŋu nì ti-pɔɔndi pu ní ti ká tigaajawan nee kɔkɔ.»

Ama ní nīn nyíǹ ni-ba kí taa súntí ti-Dindaan ni-Nimbɔtiu pu kí dū u-marab nì u-bɔkpaaŋi nì u-koobiliŋ ŋin m tīī-ni díǹ nee kí fá.

Míǹ puee, ni máaǹ kí béé tiŋan yii, kii unil nín dàkà u-biki puee, míǹ mbaantiim ní ti-Dindaan ni-Nimbɔtiu mun dàkà-ni.

Ni yaa láa jíń ki díkée, ní dāá jāam̀ ti-Dindaan ni-Nimbɔtiu, kitimmɔntii kin u tīī-nee pu.

Nín̄ ŋúb́maan ti-Dindaan ni-Nimbɔtiu marab, kí nīn ŋáań u nín là puee ní kí nīn fàŋkí-u.

Kuteeu gbanti poonee u kpíiǹ-ni, ki tīī-ni maana un ni-naanjab kaa nìn pée nyí ki kée. U yāntì ni ká agìń kí cɔ̄ŋkì-ni, ní boonee kí dāá ŋá-ni tiŋan ní.

Ni làá dāá jī kí díkí, ní kí dāá mā adimɔnti kí nīn kóò. Ni làá dāá nīn cáá inaa nì ipii nì iŋoobu tikpil, kí dāá nīn cáá animbil nì sindaariyab tikpil, ní kí dāá nīn cáá tigaajawan kɔkɔ nì ti-bulifi. Ama ní nīn nyí kí taa kpántí bilambidambi kí súntí ti-Dindaan ni-Nimbɔtiu un nyántìń-ni Eejipiti tiŋki kin poon ni nìn sá iyumbuee pu.

Kun puee ti-Dindaan ni-Nimbɔtiu làá dū-ni kí kɔ́ǹ kitimmɔntii poon ní. Kitiŋ gbanti cáá ibun nì inyimbul nì nnyim min dɔ̄ kitiŋ taapu ki púǹ ditantakalin nì dijool pu ki pùub̀ee. Kitiŋ gbanti puee, bilee nì ɔɔji lòoǹ abil ní tikpil ní fiinyi nì fiigi nì greenaadi sufii mun lòoǹ tiŋan, ní ɔliifi kpam nì tisiil gbí. Kitiŋ gbanti poonee, dikpaasiil kpá ní tiba nì tiba kaa làá lóó-ni. Kitiŋ gbanti taŋkpeeŋi cáá tikúti ní ki-jooŋŋi sá tikúman.

Ni máaǹ kí nīn ŋúb́ marab bin m tīī-ni díǹ nee ní kí ŋá bi nín bí yii ní ŋá puee. Ni yaa ŋá mimmee, ni làá nīn bí dimaŋfalin ní kí bùtī, ní kí kɔ́ kí fōō kitiŋ kin ti-Dindaan nìn pōoǹ kí tīī ni-naanjabee.

Abin imuŋku ili ŋin ni ŋá kuteeunee, ni-wampeeŋkaati kaa cátàaa, ni-taaŋi mun kaa díkí.

Úǹ di nìn līī ni-nyɔkɔpu ní ki cáá-ni ki jítì kuteeu kun wāā bàaa ki cáá tifaandi, ki sá ikoobu in cáá tiloolee nì inoom ŋmee pu. Kitiŋkuliŋŋi laakin nnyim kpée, u yāntì nnyim nyáń ditaŋkpal din pɔ̄ɔ̄yee poon ki tīī-ni.