Popular Bible Verses from 1 AKORINTHO 13

Share

Wendo ibwetagîîra, na bûrî kîao. Bûtirî rûriitho, bûtiîbûkagîîria kana bwîkumia, bûtiagaga nthoni, bûtiîbendagîîra, bûtithûûrangaga na mpwî, na bûtitaraga maita mara muntû abîtîrîtue.

Bûtikuyaga nkoro, bûkaraga bwîtîgîîtie, bûrî na wîrîgîîro, na kûûmîîria.

Wendo bûtikenagîîra ûthûûku, bûkenagîîra ûmma.

Kwoogu mantû mama mathatû makaathi na mbere kwîgua marî oogo. Na mo i wîtîgio, wîrîgîîro, na wendo. Na kîrî mo wendo i bu bûkûrûkîîte monthe.

Wendo bûtithiraga, îndî kîewa kîa ûroria kîo gîkaûra. Kîewa gîa kwaraia ndwaria ingeni kinya kîo gîkaathira. Na wana kîewa kîa ûmenyo gîkaûra.

Wana ûkeegua mbûmba kwaria ndwaria cia antû bara bangî, kana kinya cia araîka, ntarî na wendo i gîtuma nkûringa mana ta kîa ngonia kana gîa kîgamba.

Kana ûkeegua ndî na kîewa kîa ûroria ûkeegua imbiyî iriga bionthe na ndî na ûmenyo bunthe, kana ndî na wîtîgio bûûmba gûtûma kîrîma gîkûûka, ntarî na wendo, ndî wa mana.

Kana wana nkaa nkîa into biakwa bionthe, kana nkeeruta nkabîîthua, ntarî na wendo bûbu gûtirî bu bûnteethia na bu.

Rîra ndarî mwana, ndaaragia ta mwana, ngeeciiria ta mwana, na nkathûgaania ta mwana. Ngûtuîka muntû ûmûnene, indatiganire na mantû mamu ma wana.