Popular Bible Verses from MATAIO, 24

Share

E maalili foi loto o tagata e toatele, ona ua tupu tele o le amio leaga. A o lē tumau seia oo i le gataaga, e faaolaina lea.

E tala‘iina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.

E faalogo outou i taua ma tala o taua; ia outou, ne‘i tou atuatuvale; auā e ao ona taunuu o nei mea uma, a e lei oo i le gataaga.

Auā e sii le taua e le tasi nuu i le tasi nuu, ma le tasi malo i le tasi malo; ona oo mai ai lea o oge, ma faamai, ma mafuie i lea mea ma lea mea. O na mea uma o le amataga ia o puapuaga.

E mavae atu le lagi ma le lalolagi, a o a‘u upu e le mavae atu lava ia.

Auā e toatele e o mai i lo‘u igoa, ua faapea ane, O a‘u nei o le Keriso; latou te faaseseina foi tagata e toatele.

Ona latou tuuina atu ai lea o outou i le puapuaga, ma latou fasiotia outou, e inosia foi outou e nuu uma ona o lo‘u igoa. O ona po ia e tausuai ai tagata e toatele, e faalata le tasi i le tasi, ma feitagai i latou. E tutū mai foi perofeta pepelo e toatele, latou te faasese foi i tagata e toatele.

Ona tali atu ai lea o Iesu, ua faapea atu ia te i latou, Ia outou, ne‘i faaseseina outou e se tasi.

O le mea lea ia outou nofo sauni ai; auā o le itu aso tou te le manatunatu ai e sau ai le Atalii o le tagata.

O lea, ia outou mataala ai; auā tou te le iloa po o le fea itu aso e sau ai lo outou Alii.

A o lea aso ma lea itu aso e le iloa e se tasi, e le iloa lava e agelu i le lagi, ua na o lo‘u Tamā lava.

Auā e tutū mai Keriso pepelo, ma perofeta pepelo, latou te faia foi faailoga tetele ma vavega, ina ia faasese ai i e ua filifilia lava, pe afai e mafai ai.

A e pei o ona po o Noa, e faapea foi pe a sau le Atalii o le tagata. Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, na le iloa foi e i latou ina seia oo le lolo, ma aveesea i latou uma; e faapea foi pe a sau le Atalii o le tagata.