Popular Bible Verses from Arumi 11

Share

Maana, Mulungu ndiyeumba vyosi, yiye ndiye avihendaye vyosi vikaleko, na vyosi vi kuko kwa dzuluye. Ndo Mulungu naalikwe hata kare na kare! Amina.

Ajeso asena, naalikwe muno Mulungu, kwakukala, unaahenza muno atʼu osi, una hekima muno, na unamanya muno gosi. Kʼakuna mutʼu aidimaye kusema wamuziwe, na kʼakuna mutʼu aidimaye kumanya njiraze!

Gago ganagwa sawa na Maandiko ga Mulungu gaambago, “Kʼakuna mutʼu aidimaye kumanya maazo ga Bwana Mulungu, hebu kumupʼa utumia.

Ndo, gago gahendekago vivi ganga gago, mana, kuna Aiziraeli achache ario anatiya kwa Mulungu waatsagula kwa mbazize mwenye. Na kwahivira ao anatiya kwa mbazi za Mulungu, hʼaya gago kʼagalairirana na gao ahendago. Ela kalapho ni kwa gao ahendago, zingari kukala tsʼi mbazi.

Ndo chitʼu ni kwamba, vitai vinjine vya muzeituni wa mundani vyatemwa, na vichihwalwa vitai vya muzeituni wa weruni vichigwizanywa na o muzeituni wa mundani. Mwimwi atʼu a makabila manjine munga dza vivyo vitai vya muzeituni wa weruni, na vivi namwi munapata nguvu kulaa kwa o waziya wa o muzeituni wa mundani. Ndo mwimwi mutsʼiaphurye ao Ayahudi anjine otemwa dza vitai. Mwimwi tsʼidziunuleni, mana, kʼamuyipʼa nguvu mizi, hata ni yo mizi ndiyo yimupʼayo nguvu.