Popular Bible Verses from Arumi 1

Share

Mimi yiyo Nguma Mbidzo tsʼiyonera haya kamare, mana, yina widimi wa Mulungu wa kwativya osi akuluphirao, kwanzira siswi Ayahudi, hata atʼu a makabila manjine nao.

Yiyo Nguma Mbidzo yinangʼaza lwazu-lwazu vivyo Mulungu aphokeravyo atʼu dza enye haki, na Mulungu uphokera mutʼu kwa kuluphirore tu bahi. Vivi vinagwa sawa na Maandikoge gaambago, “Mutʼu yedziphokerwa ni Mulungu dza mwenye haki kwa kumukuluphira yiye, undakala na uzima.”

Kulaira Mulungu ariphoumba urumwengu, atʼu anamanya chividzo kukala, widimiwe kʼauna musindikizo, na yiye ndiye Mulungu wa jeri. Maneno gago kʼagaoneka, ela ganamanyikana. Atʼu gago anagamanya, kwa kona vivyo vitʼu vyoumbwa ni yiye Mulungu. Ndo atʼu kʼaana cha kudzihehera.

Atʼu anamanya kukala, kuna Mulungu, ela anarema kumwishima, na kumulavira mumvera dza Mulungu wa jeri. Ndo maazo gao gadziima kʼagana tende, na ga dzizani.

Atʼu ao áricha kukuluphira ujeri wa Mulungu achikuluphira ulongo. Ao áabudu na kuhikirahikira vyoumbwa ni Mulungu, achiricha kumuvoya na kumuhikirahikira yiye Muumbi mwenye, ariye unawirya kulikwa hata kare na kare! Amina.

Mulungu unangʼaza vyondaabitʼira chitai adambi osi ario anauziza ujeri, kwa gago gao mai gosi agahendago.

Ndo gago ndigotuma hata Mulungu achiaricha atʼu akale na tʼamaa zao mbii, hata ache achihendana ache, maneno garigo tsʼigo ga kawaida. Alume nao achiricha ga kawaida ga kulala na ache, hata ao ahenza kuhendana ache ao enye, na vivi Mulungu unaatiya akili awiryayo, kwa gago gao mai gogahenda. Atʼu árema kutuwa gokala anagamanya dzulu ya Mulungu, na ndo Mulungu naye achiaricha akale na akili za kuhenza kuhenda mai, kwa hata ahende gago arigo kʼaawirya kugahenda.

Enye anadzona ana hekima, ela ni azuzu. Ao anaricha kumuvoya Mulungu ariye moyo hata kare na kare, ao anavoya vinyago, virivyo vyatsongwa dza atʼu ario anafa, nyama a kuburuka, nyama a magulu mane, hebu nyama a kuhambala.