Popular Bible Verses from Ginpadayag 19

Share

Pagrayhak ngan pagkalipay kita; dayawon ta an iya pagkagamhanan! Kay inmabot na an takna han pagkasal han Kordero, ngan andam na an iya pangarasaw-on.

Dida han iya bado nga hilawig ngan dida han iya paa nahisurat an ngaran: “Hadi han mga hadi ngan Ginoo han mga ginoo.”

Niyan hinkit-an ko nga nabuksan an langit, ngan nakadto in busag nga kabayo. Matinumanon nga Matuod an ngaran han nasakay hini; an iya katadongan amo an naghuhukom ngan nakikig-away.

An iya mga mata sugad hin nagdidilaab nga kalayo, ngan damo an mga korona ha iya ulo. May-ada ngaran nga nahisurat dida ha iya, kundi hiya la an maaram hini nga ngaran. Luob hin dugo an iya hilawig nga bado. “An Pulong han Dyos” amo an iya ngaran.

Ginmuwa ha iya baba in matarom nga espada, nga amo an iya gagamiton hin pakadaog han mga kanasoran. Maghahadi hiya hin masigpit ha ira, ngan pagpupug-on niya an bino dida han piriihan han makalilisang nga kapungot han Dyos nga Labi Kamakagarahum.

Ginpriso an mapintas nga mananap upod an diri matuod nga manaragna nga nagbuhat hin mga milagro ha atubangan han mananap. (Pinaagi hini mga milagro, ginlipat niya adton may-ada tigaman han mapintas nga mananap ngan adton nagsingba han ladawan han mananap.) Iginlabog nga buhi an mapintas nga mananap ngan an diri matuod nga manaragna ngadto han linaw hin kalayo nga naglalaga hin asufre.