Popular Bible Verses from Saray Taga Colosas 1

Share

Inlaban to itayon nanlapud kabilongetan tan inyalis to itayod panarian na inararo ton Anak.

Ta diad panamegley to, apalsa ray amin a walad tawen tan dalin, nanengneng man o andi, pati saray maispiritun pakayari, kakatawan, manoley, tan saray walay betang. Apalsa ray amin a bengatla diad panamegley to tan para sikato.

Sikatoy wala la kasakbayan ya apalsay amin a bengatla tan diad panamegley to, maokoksuy ya amin iray bengatla.

Si Cristo et indengan na Dios ya ag nanengneng. Sikatoy pangulowan ya Anak, manona nen say amin a pinalsa.

Kanyan nanlapud samay impakadngel miy nipaakar ed sikayo, lawas mi kayon ipipikasi. Kekerewen mid Dios a panoen to kayo komuy pakaamta na linawa to, a tinekepay maispiritun kakabatan tan pakatalus. Diad ontan, makapambilay kayon onung ed linawa na Katawan, tan magmaliw kayon makapalikliket ed sikato. Makapambunga ki met ed satan na amin a klasiy maung iran gawa, tan ombaleg so pakapikabat yod Dios.