Ang polong sang GINOO nga nag-abut kay Jeremias nga manalagna nahanungud sa mga Filistinhon, sa wala pa masamad ni Faraon ang Gaza.
“Amo ini ang ginasiling sang GINOO:
Yari karon, nagataas ang mga tubig gikan sa aminhan,
kag manginsulog nga nagapanglambas;
magalapaw sila sang duta kag sang tanan nga yara sa iya,
sang banwa kag sang mga nagapuyo sa iya.
Ang mga tawo magasinggit,
kag ang tanan nga pumuluyo sang duta magahaya.