Popular Bible Verses from 2 PEDRO 1

Share

Ang iya diosnon nga gahum naghatag sa aton sang tanan nga butang nga nahanungud sa kabuhi kag pagkadiosnon, bangud sa pagkilala sa iya nga nagtawag sa aton paagi sa iya kaugalingon nga himaya kag pagkahalangdon, nga bangud sini gintugut niya sa aton ang iya hamili kag tama kadaku nga mga saad, agud nga paagi sini sa ila mangin-umalambit kamo sang kinaugali nga diosnon, kag makalikaw sa kaduluntan nga yara sa kalibutan bangud sang kailigbon.

Tungud sini gid nga kabangdanan magtinguha sa pagdugang sa inyo pagtoo sang pagkahalangdon, kag sa pagkahalangdon idugang ang ihibalo, kag sa ihibalo ang pagpugung sang kaugalingon, kag sa pagpugung sang kaugalingon ang pagkalig-on, kag sa pagkalig-on ang pagkadiosnon, kag sa pagkadiosnon ang paghiliutud nga malolo, kag sa paghiliutud nga malolo ang gugma.

Kay kon ining mga butang inyo kag nagabugana, ginahimo nila kamo nga mapuslanon ukon mabungahon sa pagkilala sa aton Ginoong Jesu-Cristo.

Busa, mga kauturan, himulati pa gid ninyo sa paglig-on sang pagkatinawag kag pagkapinili ninyo, kay kon maghimo kamo sini indi gid kamo mapukan