Popular Bible Verses from Mga Taga-Roma 14

Share

Kay ang paghari sang Dios sa aton mga kabuhi wala sing kaangtanan sa pagkaon ukon sa ilimnon, kundi nahanungod sa pagkamatarong, paghidait kag kalipay nga ginahatag sang Espiritu Santo. Kag ang bisan sin-o nga nagaalagad kay Cristo sa sini nga paagi, ginakahamut-an sang Dios kag ginapakamaayo sang tawo.

Kon nagakabuhi kita, ini tungod kay nagakabuhi kita para sa Ginoo. Kag kon mapatay kita, ini tungod kay nagakamatay kita para sa Ginoo. Gani, bisan nagakabuhi kita ukon nagakamatay, iya kita sang Ginoo.

Gani, dapat naton tinguhaon sa gihapon ang mga butang nga nagadala sing paghidait kag nagabulig sa pagpalig-on sang tagsatagsa sa aton.

Gani, untaton na naton ang paghukom sa isa kag isa. Sa baylo, amo ini ang aton himuon: indi kita maghimo sing bisan ano nga makapasandad kag makadala sang aton utod sa pagpakasala.

Kay ang kasulatan nagasiling: “Siling sang Ginoo, samtang nagakabuhi ako, ang tagsatagsa magaluhod sa akon atubang, kag ang tagsatagsa magatuad nga ako amo ang Dios.” Gani, ang tagsatagsa sa aton magahatag sing husay sang iya kaugalingon sa Dios.

Batuna ninyo ang tawo nga maluya sa iya pagtuo, kag indi ninyo pagsuaya ang iya panghunahuna nga ginapabutyag.

Sin-o ka bala nga maghukom sang suloguon sang iban? Ang iya lamang Agalon amo ang magahukom kon bala ang iya ginahimo maayo ukon malain. Kag magahimo sia sing maayo, tungod kay ang Ginoo amo ang magabulig sa iya.