Popular Bible Verses from Mga Taga-Roma 1

Share

Ang akon pagsalig sa Maayong Balita bug-os gid. Ini amo ang gahom sang Dios sa pagluwas sang tanan nga nagatuo, nahauna ang mga Judio kag dason ang mga Hentil.

Kay ginapahayag sang Maayong Balita kon paano ginabaton sang Dios ang mga tawo nga may pagtuo, sila lamang nga nagatuo. Suno sa ginasiling sang kasulatan, “Ang mga tawo nga ginabaton sang Dios paagi sa pagtuo magakabuhi.”

Sugod pa gid sang pagtuga sang Dios sang kalibutan, ang iya wala sing katapusan nga gahom kag diosnon nga ugali, bisan indi makita, napahayag na sing maathag sa mga tawo paagi sa mga butang nga iya gintuga. Gani wala sila sing bisan ano nga ibalibad.

Bisan nakilala nila ang Dios, wala sila nagapasidungog kag nagapasalamat sa iya. Sa baylo, nanginwalay pulos ang ila mga panghunahuna kag ang ila kalong nga mga ulo napuno sang kadudulman.

Ginabayluhan nila sing kabutigan ang kamatuoran nahanungod sa Dios. Ginasimba kag ginaalagad nila ang mga tinuga sang Dios, kag indi ang Manunuga nga dalayawon sa gihapon! Kabay pa.

Ang kaakig sang Dios ginapahayag halin sa langit batok sa tanan nga kasal-anan kag kalautan sang mga tawo. Ang ila malaut nga mga pagginawi nagaupang sa pagkilala sang kamatuoran.

Tungod kay ginahimo ini sang mga tawo, ginpabay-an sila sang Dios sa ila makahuloya nga mga balatyagon. Bisan pa ang mga babayi nagaginawi batok sa kinaugali, kay nagapakighilawas sila sa pareho nila nga babayi. Amo man ang mga lalaki, wala sila nagapakighilawas sa mga babayi, kay nagasilabo ang ila balatyagon sa pareho nila nga lalaki. Nagahimo sila sing makahuloya nga mga butang sa pareho nila nga lalaki, kag tungod sini nagabaton sila sa ila kaugalingon sang silot nga takos sa ila malain nga ginahimo. Tungod kay ang mga tawo indi magkilala sang kamatuoran nahanungod sa Dios, ginpabay-an niya sila sa ila mahigko nga mga panghunahuna, sa bagay nga ginahimo nila ang mga butang nga indi nila dapat himuon.

Nagapakaalam sila, pero mga buangbuang. Sa baylo nga magsimba sila sa Dios nga di-mamalatyon, nagasimba sila sa mga imahen nga ginhimo kaangay sang mga tawo nga mamalatyon, mga pispis, mga sapat nga apat sing mga tiil ukon mga sapat nga nagakamang.