Popular Bible Verses from Bugna 19

Share

Maghinugyaw kita kag magkasadya, dayawon naton ang iya pagkagamhanan! Kay ang tion sang kasal sang Kordero nag-abot na, kag ang iya nobya nakaaman na sang iya kaugalingon.

Sa iya malaba nga bayu kag sa iya paa nasulat ang ngalan: “Hari sang mga hari kag Ginoo sang mga ginoo.”

Dayon nakita ko ang langit nga naabrihan, kag may kabayo didto nga puti. Ang nagasakay sa sini ginatawag Matutom kag Matuod. Matarong ang iya paghukom kag pagpakig-away.

Ang iya mga mata kaangay sang nagadabdab nga kalayo, kag nagasuksok sia sang madamo nga korona sa iya ulo. May ngalan nga nasulat sa iya, ugaling wala sing may nakahibalo kon ano ini, kundi sia lamang. Ang malaba nga bayu nga iya ginasuksok nabulit sang dugo. Ang iya ngalan amo, “Ang Pulong sang Dios.”

Naggwa sa iya baba ang matalom nga espada nga iya gamiton sa pagdaog sang mga kapungsoran. Magagahom sia sa ila nga may bug-os nga awtoridad kag wala luoyluoy, kag pagapugaon niya ang bino sa pulogaan sang nagabalingaso nga kaakig sang Dios nga Makagagahom.

Ginbihag ang sapat upod sa di-matuod nga propeta nga naghimo sing mga milagro sa iya atubang. Paagi sadtong mga milagro, iya gindayaan ang may mga marka sang sapat, kag ang mga nagsimba sa imahen sang sapat. Ang sapat kag ang di-matuod nga propeta gintagbong nga buhi sa linaw sang kalayo nga nagadabdab upod sa asupre.