Popular Bible Verses from Isaias 11

Share

Ang Espiritu sang GINOO magahatag sa iya sing kaalam, sang ihibalo kag sang abilidad sa paggahom sa iya mga tawo. Makilala niya ang kabubot-on sang GINOO kag magapasidungog sia sa iya, kag may kalipay sia sa pagtuman sa iya. Indi sia maghukom paagi sa iya makita ukon paagi sa sugidsugid lang.

Ang harianon nga linahi ni David kaangay sang isa ka kahoy nga ginpulod, pero subong sang pagpanalingsing sang puno sang kahoy nga ginpulod, subong man magabangon ang bag-o nga hari gikan sa mga kaliwat ni David.

Pagahukman niya ang mga imol sing nagakaigo, kag apinan niya ang kinamatarong sang mga mapainuboson. Sa iya mando ang katawhan pagasilutan, kag ang malaut nga mga tawo magakalamatay.

Magagahom sia sa iya mga tawo sa katarungan kag kamatuoran.

Sa Sion, ang balaan nga bukid sang Dios, wala sing butang nga makahalit ukon malaut. Ang duta mapuno sang pagkilala sa GINOO subong sang mga kadagatan nga puno sang tubig.

Ang mga lobo kag mga kordero magaupdanay nga may kalinong, kag ang mga leopardo magaluko upod sa mga tinday sang mga kanding. Ang mga tinday sang baka kag ang mga tutoy sang leon magakaon sing tingob, kag ang magamay nga mga kabataan amo ang magatatap sa ila.

Ang adlaw magaabot nga ang bag-o nga hari halin sa kaliwat ni David mangintanda sa mga kapungsoran. Magatipon sila sing tingob sa iya harianon nga siudad kag magapasidungog sa iya.