Popular Bible Verses from Mga Hebreo 9

Share

Sa amo man nga bagay, si Cristo ginhalad sing makaisa sa pagkuha sang mga sala sang madamo. Magaabot sia liwat, indi sa pagkuha sang sala, kundi sa pagluwas sang mga nagahulat sa iya.

Tungod kay matuod ini, daw ano pa gid ang nahimo sang dugo ni Cristo! Paagi sa Espiritu nga wala sing katapusan ginhalad niya ang iya kaugalingon subong himpit nga halad sa Dios. Ang iya dugo magatinlo sang aton mga konsensya sa wala sing pulos nga mga buhat, agod nga makaalagad kita sa Dios nga buhi.

Gintalana sa tagsa ka tawo nga mapatay sing makaisa, kag sa tapos sini pagahukman sia sang Dios.

Matuod gid, suno sa Kasugoan, halos tanan nga mga butang ginatinluan paagi sa dugo, kag ang mga sala mapatawad lamang kon may dugo nga ginapaagay.

Sa sini nga kabangdanan si Cristo amo ang manugpatigayon sang bag-o nga kasugtanan, agod nga ang mga gintawag sang Dios makabaton sang walay katapusan nga mga pagpakamaayo nga ginsaad sang Dios. Sarang ini mahimo tungod kay may kamatayon nga nagahilway sa mga tawo sa mga sala nga ila nahimo, samtang yara sila sa idalom sang nahauna nga kasugtanan.