Popular Bible Verses from Deuteronomio 10

Share

“Karon, mga tawo sang Israel, magpamati kamo sang ginapangayo sa inyo sang GINOO nga inyo Dios: magsimba kamo sa GINOO kag tumana ninyo ang iya tanan nga ginasugo. Higugmaa man kag alagara ninyo sia sa bug-os ninyo nga tagipusoon kag kalag, kag tumana ang tanan niya nga mga kasugoan. Ginahatag ko ini sa inyo karon nga adlaw para sa inyo kaayuhan.

Ang GINOO nga inyo Dios gamhanan sa tanan nga mga dios kag sa tanan nga mga gumalahom. Daku sia kag gamhanan, kag dapat sia pagakahadlukan. Wala sia sing ginapasulabi kag indi mahamhaman.

Gani, sugod karon tumana ninyo ang GINOO kag indi magpakatig-a.

Ginatatap niya sing nagakaigo ang mga ilo kag ang mga balo, ginahigugma niya ang mga dumoluong nga nagaestar upod sa aton mga kasimanwa kag ginahatagan niya sila sing pagkaon kag mga bayu.

Dayawa ninyo sia, kay sia amo ang inyo Dios kag nakita sang inyo kaugalingon nga mga mata ang daku kag makatilingala nga mga butang nga iya ginhimo para sa inyo.

Tahura ninyo ang GINOO nga inyo Dios kag sia lang ang simbaha. Magmatutom kamo sa iya kag magsaad kamo sa iya lamang ngalan.

Bisan ang pinakamataas nga mga langit iya sang GINOO. Ang duta kag ang tanan nga yara sa sini iya man.

Gani, higugmaa man ninyo ang mga dumoluong, tungod kay kamo mga dumoluong man anay sa Ehipto.