Popular Bible Verses from 2 Timoteo 1

Share

Kay ang Espiritu nga ginhatag sang Dios sa aton wala nagapatalaw sa aton, kundi nagapuno sa aton sing gahom, paghigugma kag pagpugong sang kaugalingon.

Iya kita ginluwas kag gintawag nga mangin-iya kaugalingon nga katawhan, indi tungod sang aton mga binuhatan, kundi tungod sang iya tinutuyo kag kaayo. Ginpakita niya ini nga kaayo sa aton paagi kay Cristo Jesus sa wala pa ang ginsugoran sang panag-on.

Tungod sini ginapahanumdom ko ikaw sa pagpadabdab sang hiyas nga ginhatag sang Dios sa imo, sang gintungtong ko ang akon mga kamot sa imo.

Gani, indi ka magkahuya sa pagpanaksi tungod sa aton Ginoo, kag indi ka man magkahuya tungod sa akon nga binilanggo bangod sa iya. Sa baylo, magpakigbahin ka sa mga pag-antos tungod sang Maayong Balita, suno sa kusog nga ginahatag sang Dios sa imo para sini.

Tungod sini ginaantos ko ini nga mga butang. Pero wala ako nagakahuya sini, tungod kay nakilala ko ang akon ginasaligan kag pat-od gid ako nga sarang niya mabantayan ang iya gintugyan sa akon tubtob sa sadto nga Adlaw.