Popular Bible Verses from 2 Mga Taga-Corinto 4

Share

Kay ginabug-os namon ang amon pagtamod, indi sa mga butang nga makita, kundi sa mga butang nga indi makita. Kay ang makita umalagi lang, pero ang indi makita wala sing katapusan.

Tungod sini wala kami nagapakaluya. Bisan pa nga ang amon lawas nagaamat-amat kadunot, pero ang amon espiritu ginabag-o adlaw-adlaw. Kag ining diutay kag umalagi nga kabudlayan nga ginaantos namon magahatag sa amon sing tama ka daku kag mapinadayunon nga himaya, nga mas labi pa sa kabudlayan.

Masunson kami nagaantos pero wala kami nadaog sang nagakontra sa amon. Kon kaisa nagapangduhaduha kami, pero wala kami madulaan sing paglaom. Madamo ang amon mga kaaway, pero wala man kami mawad-i sing abyan. Kag bisan nga kon kaisa nasakit gid kami, pero wala man kami malaglag.

Pero kami nga may espirituhanon nga manggad kaangay sang tibod nga duta, agod sa pagpakita nga ang labing daku nga gahom indi amon, kundi iya sang Dios.

Wala sila nagatuo tungod kay ang ila mga panghunahuna gindulman ni Satanas nga dios sini nga kalibutan. Sia amo ang nagalipod sa ila agod nga indi sila makakita sang kapawa nga nagasilak sa ila halin sa Maayong Balita nahanungod sang himaya ni Cristo, nga amo gid ang larawan sang Dios.

Ang Dios nga nagsiling, “Gikan sa kadudulman magasilak ang kapawa!” amo man nga Dios ang nagpasilak sang iya kapawa sa aton mga tagipusoon, sa pagdala sa aton sang kapawa sang pagkilala sang himaya sang Dios, nga nagasilak sa nawong ni Cristo.