Popular Bible Verses from Mga Panultihon 3

Salig sa GINOO sa bug-os mong kasingkasing. Ayaw gayod pagsalig sa imong kaalam. Hinumdomi siya sa tanan mong buhaton ug tultolan ka niya sa matarong nga dalan.

Ayaw paghunahuna nga maalamon ka na gayod; kahadloki ug tahora ang GINOO ug isalikway ang daotan.

Pasidunggi ang GINOO pinaagi sa paghalad kaniya sa labing maayong abot sa imong yuta. Kon buhaton mo kini, mapuno sa abot ang imong mga kamalig ug manubra ang imong bino.

Ayaw gayod isalikway ang pagkabuotan ug pagkamatinumanon. Ikuwintas kini sa imong liog ug isulat sa imong kasingkasing.

Anak, kon pantonon ka sa GINOO, hatagi kinig igong kabug-aton ug ayaw wad-a ang imong kadasig tungod sa iyang pagbadlong. Kay badlongon sa GINOO kadtong iyang gimahal sama nga badlongon sa amahan ang iyang anak nga iyang gipasigarbo.

Anak, ayaw kalimti ang gitudlo ko kanimo. Hinumdomi kanunay ang gipabuhat ko kanimo. Makahatag kanimog taas ug mauswagong kinabuhi ang akong gitudlo kanimo.

Bulahan ang tawo nga may kaalam ug panabot. Mas daghan pa ang makuha gikan niini kay sa plata ug labaw pa kinig bili kay sa bulawan. Bililhon pa ang kaalam kay sa mga alahas ug wala gayoy labaw pa niini.

Ayaw ihikaw ang mga kaayohan ngadto sa nagkinahanglan niini ilabi na kon aduna kay mahimo niini.

Gibuhat sa GINOO ang yuta pinaagi sa iyang kaalam; gipahimutang niya ang langit pinaagi sa iyang kahibalo.