Popular Bible Verses from She Lukyeendo 32

Share

Babaandu ni baabona bari Musa s'alikho akobola khukhwaama khu lukiingi khaangu ta, baabusana atweela, baatsya isi Aroni. Kila bamulomela bari, “Bona Musa, umusaani uwakhureera ifwe khukhwaama i Misiri s'abonekha ta. Sikhumanya oba shinaanu shishimwoolilekho ta. Nashiryo, iwe n'ukhubuumbileyo ifwe ba wele babaanyala baakhuraangilila ifwe.”

Kila Umukasya alomela Musa ari, “Kobolayo aasi wangu, khulwekhuuba babaandu boowo beesi iwe waraangilila khukhwaama i Misiri baakholile bibyoonako. Baarurire khu mukhoosi kweesi isi nabalakila khuumenyamo, bebuumbiileyo babeene imoosi iye shiibya, baakisaayile naluundi baakikholeele iwoongo, nga baloma bari, ‘O Ba Isiraeli, bano nibo ba wele beenywe babaabarusa inywe khukhwaama mu shibala she Misiri!’ ”

Aroni n'abona ari shino shekhoyesele babaandu, woombekha shisheeso ibweeni w'emoosi. Kila akukuula ari, “Kumukaamba khuli ni khuukholela Umukasya kamayiiya.” Ni bwasha kumutikhinyi, babaandu benyukha mamilimili, bawaanayo tsisaayilo tsyaabwe tsye bibyookhe, ni biwaanwa bye lukoosi. Lwanyuma bekhala aasi khuulya ni khuunywa, baryo baakyelawo, bewaambila mu biindu bye buyeyani.

Khu shifukhu shisheelakho, Musa waalomela babaandu ari, “Mwaakholile shishoonako she kamaani naabi. Ari ingana khukhwiilayo isi Umukasya imbaloombele inywe, winyoola anyala waabeyakhila.”