Popular Bible Verses from She Lukyeendo 12

Share

Khulwekhuuba mu shilo sheene isho, ise ikhaabire mu shibala she ba Misiri, nga ikhoonyaka babaana besiinde baakiboole mu buli intsu, naluundi na buli shishaayo shiikiboole. Ise ndi niye Umukasya ni ba wele be ba Misiri boosi, kane ise imbawe shitaambiso. Kamafuki keesi kane muwakhe khu milyaango kye khu ntsu tseenywe, kane kabe nikho khaabonelo khakhantsokesa ise isi inywe mumenya. Nashiryo nga ise naboone kamafuki iko, inywe kane imbabirekho busa, nga mbaawo buwangafu bubuubakwakho khusiinywe ta, nga indikho indeera kumutaambo mu Misiri.”

Waalooselakho ari, “Inywe muli ni khuushebulilatsaka shifukhu shino, naluundi muli ni khuukholatsaka kamayiiya kano khulwekhuuba shili shifukhu sh'Omukasya. Lili likaambila lili, buli kumuboolo kuli ni khuukhola shino.”

Ne nyaanga babaana beenywe ni balibareeba bari, ‘Ne kamayiiya kano kamanyisa shiina?’ “Mubeelamo muri, ‘Khuuwaanayo isaayilo yino khuushebulila Khuubirakho khw'Omukasya. Bino khubikhola khulwekhuuba mu shilo isho khaalekho nga khuli mu Misiri, Umukasya aabirira busa angaaki khu ntsu tseefwe. Aatsya nga akhoonyaka babaana bakiboole basooleli be ba Misiri, ne babeefwe waalekha khubeera ta.’ ” Nga Musa waamalile khuukanikha, babaandu ba Isiraeli boosi baafukhamila aasi, besaaya Umukasya.