Popular Bible Verses from ROMANOS 12

Share

Niźaśa anćhukki anaź ni anśta qamañxaru qama; ans anćhukki ni anćhuka amtiśnakaź turka xalla nuź anćhukki anćhuka qamaña turkasaćha niźaśa anćhukki Yöś amtanakaź paxasaćha, xalla nïki śumaćha niźaśa walićha niźaśa ch'uwaćha.

Niźaśa jilanaka werhki anćhuk Yöś oqśñiź khen rokt'ućha, niźaśa anćhukki perśun quś Yöśkin thälla tshi źethñi wilanaźtaqaś, niźaśa źkayi Yöś pekchuka. Xalla tïćha cheqpacha Yöśkin amtiśki.

Niźaśa anćhukalta śuma thonñiź khen kuntintuź qama; niźaśa ni t'aqhiśnaka thapa aśtanź awanta; niźaśa anapan ni Yöśkin mayiśiś apatata.

Niźaśa amki ni ana walinakźkiś ana atipsqata, ans amki ni ana walinaka śumźtan atipa.

Niźaśa anćhukki tshi jilaśullkaźtaqaś thapa quśtan pekasa, anćhukkama yanapaskan niźaśa anćhukpora oqsaskan.

Niźaśa anćhukki porapat thapa quśtanź pekasa. Niźaśa anćhukki ni ana śumanakaź ćhhaxwa, ans ni śumanakkinź quś thä.

Niźaśa anćhukaź attakama thapa źoñinakźtan śumapanź qama.

Weth q'ay jilanaka, anaź anćhukpacha moq'u tanasa, ans ni Yöś juchjiptayax khe; xalla ni Yöś śuma kintu khjirtaki tuź khićha: “Xalla tuź khićha ni Yöś Tataki wethtaćha ni juchjiptayśki niźaśa weril ninakźkiś pakaćha.”

Niźaśa anćhukki walxa khïkhichiź khe anaź qhena khe, niźaśa Yöś Tatźkin thapa quśtan manta pä.

Niźaśa Yöśki nïź oqśñi quśtan wethkiś thächićha, thappacha anćhukakiś til khiwćha anćhukki anaź perśunpachkiśtan jilakama pinsa. Ans anćhukki ima ćhhuluź khen śumaź pinsa, ni Yöś anćhukaź thapa quśśiś khen onanchita patxparu.

Niźaśa anćhukatan moq'u päñiźkiś anaź niźta iratapacha thepunśki. Niźaśa anćhukki thapatiź tukkiś śumanakapanź thëźna.

Niźaśa anćhukki porapat añcha śuma quś phiyaź qama. Anapanź mita quśśiś khe, ans anćhukki ni amu quśśiś jilanakźtan chika khisna. Niźaśa anćhukki anaź śiśñi khïkhiya.

“Niźaśa amtan moq'u khiñi źoñiki ćhherit eksqatćhax nïki, nïźkiś ćhheri ona; niźaśa ni źoñiki qhaśt pekćhax nïki, ni źoñźkiś qhaś ona; xalla nuź amki ni źoñź yukh aśañpanti lhokh k'ururu khisqatakićha.”

Niźaśa anćhuk tanśxapa qhurñi źoñinakźkiś yanapa. Niźaśa anćhukki ninakźtaxapa Yöśkiśtan mayna. Niźaśa anćhukki ni kuntintu khiñi jilanakźtan chipźnakićha, niźaśa anćhukki ni qäñinakźtan chikaź qäkićha.

Niźaśa anćhuka źelinśnakźkiśtan ni Yöś kirïchi t'aqhir jilanakźkiś ona; niźaśa anćhukakiś thonśñi źoñinaka śumapanź qhawźna.

Niźaśa ućhumnaka xañchiki wakchi qisqisñinakchiśśa, thappacha ni qisqisñinakaki anaź tshi xapaqaś wakiśićha, Niźaśa ućhumnakki qhaźta tamami, Criśtuźtan tshi xañchichiśćhumćha niźaśa ućhumnakki porapat tshi quśśiśćhumćha tshi xañchiź qisqisñiźtaqaś.