Popular Bible Verses from Hamal hap de ol 12

Share

Sap nëno mae mo aya-wal oso-walya mes dowal mo kïgïsa Domba Tanena in mo kalkam alo da sonek– hen Alap onakore ol dawemkam. Sap zen ol dawemna insa tatem nyaubik, hen juwen hap hom zënaka nolëinik gwe-gwek.

Ki zebë hwëna sak– ngatan zi mo lang nakore ola mam enkam kim ëgu anek, “Hëꞌho! Angkam mes zaunun– Alap dikim zëre mo hlïl irin wenyaka ngaya tabin hip denakye. Alap mes angkam zëre mo sosonna goltreizimdi– dekam de teipsïnkïm ïrïk gïn hïp denaye. Hen mes anakan goltreizimdi, ‘Ëre mo Tanena an, Mensa Israelsa de ngaya tabin hip gu-gubirida gwekke, Zen sa ki teipsïlï.’ Sap men zen nëno mae mo aya-wal oso-walya Alap mo nwenak yaklam denaban kam denaban lamang ta gwibirki, desa mes auhu-kama san dep nëralsa sonenan.

Jalom yawala insa ki zep hëndep okama san dep hiri da inek. Zen in zen– ëpba wanyana, men zen Adam ne Hawa neka orep boton sokaye, hen men zen tïngare okamanak de zi mo enlalana karek san dep li ta sone gwizimniraye. Zëno bosena “Dowal mo Kïgï.” Aha bosena hen “Zi Golliwe Bak.” Desa mes auhu-kama san dep hiri da inek– hëndep zëre mo taha trï so gweblan wenya ban.

In zep tïngare ngatan zi mo langnak de wenya, em ëisrip-sri gwen. Hwëna okamanak de wenya hen hinak de wenya, em ëngalap gwen, sap dowal mo kïgïna mes ebon mae osan dep ati gwe ine zala. Zen angkam man sërkam jal gweꞌara, sap zen mes anakan tawa gwera, ‘Hare, aumwa hap dena angkam langanak homke.’”

Ngatan zi mo langnak dekam zep ëeijak. Alap mo dam taha nakore zi mo teipsïnnï Mikayel Bak jalomna in han hen zëno taha trï so gweblan zi niban golëeijaka.

Dekam tangan zep jalomna in wenya insa sërkam jal gwibirki, dekam zep song gweka– wenya in mo auyan-tane walsya de golëeijan hap. Zen men zen Alap onakore ol dawemna tatem nolzauk gwenanke, Yesussu de zabeblan srëmkam, desa de golëeijan hap song gweka.

Dekam zep nglïnak owas yawala jowek, nen dikim zë Alap mo kalangsa tame gun hup. Ëe wesyaë hlauk, yakla nwesa bajusa de ala son makan ala sok. Zen bennak zauk aneꞌak, hen nolak mire sigisa ala guk– dua-blas enkam de keis nibare naka. Wenya in u nuban mes tangan trï-trï gwesïk. Zen man eisbir aneꞌak, zep sang-sang hap hërhe gweꞌak.

Wenya in zi walassa zep jaha gwek– Zen de tïngare zi aususa tatete tangankam ïrïk gïn hïp. Hwëna Walasna insa ki zep Alap mo dam taha nakore zi Alap osan dep al dabik– zëre mo komal tumnak dep. Wenya in dekam zep zi srëm lang san dep heya gwek– langna mensa Alap zëbe hap hamal gulbirkike. Zëwe sa Alap mo dam taha nakore zini kara nul gwer– holona benna 42 enkam.

Dekam zep hen aha owasna etan nglïnak jowek. Zen jalom makare dowal kal-kal yawal zë joweka– bun tangan nik. Zëno nola tuju enkam, hen nola kore hli-hlina dare taha-tap enkam. Zëno mire sigina hen nol jam en. Zëno kal-kala, san de syauknu kiye. Jalomna in abala kim zep nglïnak de keisni aha hlïkna kama san dep talal soneka. Dekam zep wenya in mo dang gwën nakon zauꞌun zaka– in zen eisbir aneꞌakke. Zen man eissibiꞌinka– walasna insa de jaha gwennak ala gweblan hap.

Hwëna wenya in hap mawana heir mo sï ala yawalsa desyabik– dekam de ihen hap, zëbe en hap de lang hamal gulbin sin dep. Zëwe sa Alap mo dam taha nakore zini kara nul gwer, hen jalomna insa sa langa dasïk gwer– holona benna 42 enkam. Hwëna wenya in desan dep heya gwek, jalomna in ëk nakon zep weyasa ho namwa yawal makan wëk gwibirki– zen de sap dong gun hup. Hwëna langna iwe de kamana man wenya insa mas gwibik. Zen zep ho namwana insa ala gwibik.