Popular Bible Verses from 1 Pētero 2

Share

ꞌE a kōrua he huaꞌai toꞌo e te ꞌAtua, he oromatuꞌa aŋa ki te ꞌariki, he nuꞌu haꞌataꞌa māꞌana, ꞌe he taŋata haka tere e ia. Te ꞌAtua, kope haka eꞌa i a kōrua mai roto i te pōhāhā o te meꞌe taꞌe tano mo oꞌo ki roto i tōꞌona mōrī nui-nui ena, i haꞌataꞌa ai i a kōrua mo haka ꞌite mo oho o ruŋa i te meꞌe nui-nui aŋa e ia.

A Ietū i ꞌamo ai i te tātou hara ꞌi ruŋa i te tātaurō, ki haka rē ai a tātou i te aŋa i te meꞌe taꞌe tano, ꞌe ki tano ai te tātou noho iŋa ki te mata o te ꞌAtua. Hai ꞌamo e ia i te ꞌati i ora ai tātou. ꞌI muꞌa ꞌā, paꞌi, e haꞌere era a tātou pa he māmoe ko ŋaro ꞌana, ꞌe, hora nei, ko hoki tahi ꞌana ki te Kiritō, kope hāpaꞌo mai i a tātou pa he taŋata hāpaꞌo māmoe.

ꞌI muꞌa ꞌana taꞌe kōrua he nuꞌu o te ꞌAtua, ꞌe hora nei he nuꞌu ꞌāꞌana; ꞌi muꞌa ꞌā kai ŋaroꞌa e kōrua i te riva rahi o te ꞌAtua, ꞌe hora nei e ŋaroꞌa rō ꞌana e kōrua.

E riro kōrua pa he ŋā poki poreko iho pohe ki te ū, te auraꞌa: e pohe kōrua ki te ū parautiꞌa mo te kōrua riva-riva, he vānaŋa o te ꞌAtua, mo haka pūai mo oho o te kōrua manaꞌu ꞌi ruŋa i te ꞌAtua ꞌātā ki te mahana ka toꞌo ena i a kōrua ki te raŋi pe muꞌa ka oho ena.

E te taina, a kōrua pa he nuꞌu o te kona kē noho ꞌi te ao nei mo te hora ꞌiti-ꞌiti nō e tahi. ꞌO ira, ꞌina ko vaꞌai i a kōrua ki te meꞌe pohe nō o te hakari, he meꞌe haka tapa i a kōrua mai te ara o te ꞌAtua. E noho kōrua ꞌina e tahi hape ꞌi roto i te nuꞌu taꞌe haŋa ki te ꞌAtua. Mo noho o kōrua pē ira, he takeꞌa e rā nuꞌu i te meꞌe riva-riva aŋa e kōrua ꞌe he haꞌahana-hana ki te ꞌAtua ꞌi te mahana ka kī era e ia i te meꞌe tano ꞌe i te meꞌe taꞌe tano aŋa e te taŋata, ka ai atu ꞌi te hora nei e kī rō ꞌana e rāua pē nei ē: a kōrua he nuꞌu aŋa i te meꞌe taꞌe tano.

A kōrua takoꞌa pa he māꞌea ora, ꞌe te ꞌAtua, hai ŋā māꞌea ora ena ko kōrua, e aŋa mai ena i te kona mo haꞌamuri ki a ia. ꞌI roto a kōrua pa he ⌊oromatuꞌa⌋ haꞌataꞌa e ia māꞌana tūtia ki a ia i te meꞌe riva-riva haka poreko e te Vārua Maitai ꞌi roto i a kōrua, he tūtia koa ꞌāꞌana ꞌo te ai o kōrua ꞌa Ietū Kiritō.

ꞌE hora nei, ꞌi te ai i a kōrua te ora ꞌāpī, e haka kore mai ruŋa i a kōrua te meꞌe taꞌatoꞌa taꞌe tano: te reo-reo, te haka tuꞌu i a kōrua pa he nuꞌu riva ꞌe rā riva a te haho ꞌā, te nou-nou ki te meꞌe o te rua, ꞌe te haꞌaꞌino.

E haka hāhine kōrua ki a ia, he māꞌea ora taꞌe haŋa era e te taŋata, māꞌea haꞌataꞌa e te ꞌAtua, ꞌe māꞌea hauhaꞌa rahi.

E noho kōrua pa he nuꞌu taꞌe haka tere e te meꞌe o te ao nei; te ꞌAtua, paꞌi, ko haka eꞌa ꞌana i a kōrua mai rā haka tere iŋa. ꞌE, ka ai atu pē ira, e uꞌi ꞌo riro te parautiꞌa nei he ꞌōtohe e tahi mo aŋa o kōrua i te meꞌe taꞌe tano. Te meꞌe haŋa mau: e noho kōrua pa he tāvini o te ꞌAtua.

Te ꞌAtua, paꞌi, e haŋa rō ꞌana mo aŋa o kōrua i te meꞌe riva-riva. Pē ira he ꞌapi i te haha o te nuꞌu maꞌa-maꞌa tuhi atu i te kōrua hape, he taꞌe haŋa mo aŋi-aŋi i te meꞌe o te ꞌAtua.