Popular Bible Verses from 1 Pedro 2

Share

Dios is̈cupiugau pa is̈wayjatcáj. Dios as̈am rey mit je' is̈yajcau pa pa̱nijat pa is̈servia̱tcajawa'n je'. Dios is̈-aparta̱tcau mit is̈actangap pa je'. Jat we'n pa is̈nʉmdacyo'ygawa'n nu'pʉjʉn cosa oyway iwatpay Dios, ni'c Dios is̈ya̱s̈cau pa pi cuyaguiga nu'pʉjʉn mal, pa we'n miyo'ygáj Dios iluzni'c oymanacway.

Cristu itunas̈ pa ʉjtsat mit itsʉm nu'pʉjʉn mal nawatcaway cuandu i-o'jc cunu̱s̈ni'c. Je' iwat we'n pa ʉjtsat natsʉ̱́nga libra̱tic pa nagajawátca mal, mit we'n nayo'ygáj yacs̈ic. Mit je' imoyta̱jcau pa mijchat pi oytanga. Ni'c mijchat mitsʉ̱ngau as̈am borregujat jeme cunʉs̈igapay, po jinap incutomigau Cristu ni'c je' as̈am tu'c borregucuida̱tpay, mit je' icuida̱tp imvidajat.

Mijchat primeru migaje'jat Dios is̈jayajwat, po jinap mijchat Dios is̈jayajwat. Primeru Dios is̈ca-ayo̱wis̈cawu, po jinap Dios is̈-ayo̱wis̈canup.

Jinap mitsʉ̱ngap as̈am yauya̱wájat. Oy pi wanga tu'c leche camoticway mit ma̱jlat, ayé inʉmo'jcʉp ni'c pi wanga puru cosa oyway iyacpay Dios, pa we'n miye'jcáj mit mitsʉ̱ngáj salva̱tic.

Mijchat tʉwangʉs̈pay, mitsʉ̱ngap as̈am pe'ta̱majyat en ayʉ̱́j mundu mit as̈am miyo'ygapay jayna̱s̈ni'c. Tʉnʉmgʉs̈ap pi niju'ptangʉjʉ de ayé ma̱jlat iyo'tpay injo̱jtat, ni'c ayé ma̱jlat oyap is̈atujcap mit is̈actogoygáj. Niportá̱tcʉjʉ oy mam is̈-e'pcap ayé jayajwat jeme iga-is̈capcapay Dios. Jinap is̈tucotscap ni'c mimaljayajwat, po majawe'naj i-e'pcáj ni'c inwatcap oy, mit i-oyninʉmgáj Dios en ayé s̈ʉjw cuandu i-arregla̱twa'n.

Cristu is̈moygau nam vida ni'c inmutʉgʉygau je' mit jinap Dios is̈pʉjcáj as̈am tu'c templu mam je' itsʉ̱nawa'n. Mit Dios is̈-aparta̱tcau pa intsʉ̱ngawa'n as̈am pa̱nijat pa is̈servia̱tcajawa'n je', mit oyáj is̈cótscaja Dios tu'c ofrenda jeme je' ipʉctsowámpay, ni'c Cristu is̈moygap favor.

Jinap cuyáguiga nu'pʉjʉn ma̱jlat mit nu'pʉjʉn we̱jtat. Mit camniwe̱tcʉjʉ mijchatu. Cam-ánga jeme ijtʉpay más, mit camtucótsca nepʉn.

Nacutómiga Cristu ni'c je' as̈am tu'c tsa' itsʉmtso̱pay nu'pʉjʉn, mit je' nas̈moygap vida. Jayajwat igawangawu Cristu, po Dios icupi̱u mit iwano'cp.

Jinap mitsʉ̱ngap libre po caje' pa is̈watcawa'n mal. Dios is̈libra̱tcau pa is̈servia̱tcajawa'n je'.

Dios iwamp pi watca oy, pa we'n in-awatujcáj jeme iga-is̈capcapay Dios, ni'c je'jat igajawigap ti inʉmgapay.